Atualità
Consulta por la cultura ladina: 120 proiec é gnüs ejaminà
USP - Sot ala presidënza dl assessur Florian Mussner él gnü tignì l’edema che é stada döes sentades dla Consulta por la cultura ladina dla Provinzia a Corvara. Le punt plü important sön l’ordinn dl dé ê le tratamënt de presciapüch 120 domandes de porsones che laora tl ciamp dla cultura. Al é gnü spôrt n contribut de 720.000 euro.
Ara se trata de domandes por mëte a jì ativitês culturales y por fà investiziuns culturales. N pêr de domandes à messü gnì sciurades zoruch y sön d’atres gnaràl tut na dezijiun plü tert. Les uniuns singules à dantadöt presentè domanda por cumprè stromënć musicai, trohtes, aredamënt o mesi tecnics. “Nosc budget é plü o manco sciöche chël da l’ann passè y porchël po majeres investiziuns gnì ma en pert sostignides cun i mesi finanziars por la cultura”, à dit Florian Mussner. La Consulta por la cultura ladina à inće baié di criters aladô de chi che la Provinzia assegnëia i contribuć tl ćiamp dla cultura. “Bele l’ann passè unse porvè da se destanzié dal fat de ti dè massa püch a tröc por trà dant proieć mirà y conzeć tlers dla cultura ladina” à splighé Mussner. “De gran proieć po indere ma gnì promoiüs sc’al vëgn tignì zoruch dassënn cun i finanziamënć por d’atri proieć. Dal’atra pert sunsi dla minunga che l’impëgn di comëmbri volontars che se dà da fà tles assoziaziuns desvalies por la cultura ladina foss da onorè” à dit Mussner. D’atri punć de discusciun pro les döes incuntades é sta le forum de cultura anual cun les porsones che laora tl ćiamp dla cultura y l’indunada en gaujiun dl “Dé dla cultura ladina”. En chësc ann gnaràl tratè la toponomastica ladina cun porsones espertes te chësc setur.USP
