Atualità
Pröma incuntada dles jornalistes y di jornalisc ladins a Cianacëi
USP - Te chisc dis é Cianacëi tl zënter dl’informaziun por i Ladins. Cotan de jornalistes y jornalisc ladins é rovà adalerch dales cater valades ladines, dala Val Badia, da Gherdëna, Fascia y Fodom y cinamai dala Svizra rumancia por tó pert ala pröma incuntada di jornalisc ladins che à metü man inier jöbia, ai 19 de mà 2005. Chësta incuntada che jarà inant por trëi dis alalungia é gnüda metüda a jì dala Provinzia de Balsan en colaboraziun cun le departimënt ladin. Inier êl ince presënt l’assessur Mussner.
Tl zënter dl’incunatada di jornalisć ladins n’él nia ma n barat danter i jornalisć y les jornalistes mo bëgn inće le mantegnimënt dla cultura ladina y dl lingaz ladin. Inier él gnü presentè i media ladins desvalis y incö, vëndres jaràra inant cun la valorisaziun dl lingaz ladin tla informaziun di Ladins y cun la colaboraziun danter i media ladins. Sön le program da en doman, jöbia él na vijita al Muesum Ladin de Fascia a San Jan. “Sc’an pënsa che tröc sorvisc por i media ladins à metü man sciöche ativitês volontares spo à bëgn i media ladins fat n gran vare inant” à alzè fora inier l’assessur Mussner pro la daurida di dis dedicà ai jornalisć. Sc’an ti ćiara a “La Usc di Ladins” o a „Trail“ pon se tó a dì ch’al vëgn fat informaziun te na manira profescionala mo inće plajora, à dit l’assessur. “L’informaziun é assolutamënter nezesciara por n svilup positif dla mendranza ladina. Les informaziuns di media à la funziun importanta de dè inant la cultura dla parora y dl lingaz” à dit Mussner. La incuntada danter les coleghes y i colegs jornalisć é de importanza por le sentimënt de solidarieté y implü pon se baratè fora n gröm d’esperiënzes, à dit i jornalisć che à tut pert.USP
