Atualità

Scora / Cultura | 05.07.2005 | 16:10

Incuntada dl assessur Mussner cun la consula generala Ziegler

USP - Inier lönesc, ai 4 de lugio 2005 à Eva Maria Ziegler, consula generala austriaca a Milan incuntè l’assessur Mussner. Danter ater à i dui rajonè dla situaziun atuala di ladins, dla cultura ladina y dl barat cultural cun l’Austria.

L’assessur Florian Mussner ti à portè dant ala consula generala Ziegler n cheder scialdi positif dla situaziun atuala di ladins te Südtirol. Sciöche mendranza vëgn i ladins defenüs indortöra; ti agn che é stà él gnü metü sö de plü istituziuns por le mantegnimënt dla cultura ladina sciöche l’Istitut ladin „Micurà de Rü“ o le Museum Ladin a San Martin de Tor, che la consula generala à vijité tratan l’isté dal ann passè. Inće por le grup linguistich ladin te Südtirol é le barat cun l’Austria d’importanza, à afermè Mussner. Dantadöt tl ćiamp dla cultura po n dialogh costant y na colaboraziun che va sura le confin fora portè zënzater de bogn früć, à dit Mussner. Sciöche assessur por i laûrs publics à Mussner inće porté dant la surandada de inćiaries publiches a dites austriaches; chilò fóssel aladô de Mussner debojëgn de superè n valgönes desvalianzes por ći che reverda la previdënza. Sides la consula generala Ziegler che inće l’assessur Mussner à alzè fora les bones relaziuns danter Südtirol y la Republica austriaca. Le laûr te Südtirol é de gran importanza por ëra à sotligné la consula generala; dlungia les incunatades cun i rapresentanć dla politica y dles istituziuns publiches se trâtera dantadöt de se dè da fà por i interesc di austriacs che vir te Südtirol. Tles ot regiuns che alda pro le ćiamp de competënza dla consula generala vìrel indöt presciapüch 6000 zitadines y zitadins cun na nazionalité dopla. Ziegler à splighé che le consulat general a Milan é öna dles trëi sëntes diplomatiches plü importantes dlungia les sëntes de Minca y de New York.

USP

Galaria dales fotografies