Atualità
Consëi de Direziun dles scolines ladines nominé danü
En lönesc à la Junta provinziala nominé danü le Consëi de Direziun dles scolines ladines. N valgügn comëmbri é restà anfat, d’atri é gnüs nominà danü. La surastanta dl Consëi de Direziun dles scolines è la direturia Edith Ploner.
Te süa sentada da en lönesc à la Junta provinziala sön domanda dl Assessur competënt dr. Florian Mussner nominé döes rapresentantes dles comunitês comprensoriales dl Salten Scilier y de Puster, n valgügn esperć y espertes tl ćiamp dl’educaziun, di sorvisc sanitars y soziai a fà pert dl Consëi de Direziun dles scolines ladines. Ara se trata plü avisa dla referënta dl Comun de Urtijëi Elisabeth Baur por la Comunité comprensoriala dl Salten Scilier y de Hildegard Tasser da San Martin por la Comunité comprensoriala de Puster. Inant resta le psicologh Ludwig Santifaller, la doturia di mituns Elisabeth Delago, le diretur dl Istitut Pedagogich Theodor Rifesser y la dirigënta di sorvisc soziai de Gherdëina Martina Comploi sciöche porsones espertes. Les rapresentantes dles maestres é: Sabine Perathoner, Barbara Deval, Rosmarie Senoner y Margit Linder y chëres dles colaboradësses pedagogiches Consolata Nagler, Maria Pia Pezzei y Adele Lobis. I geniturs gnarà rapresentà da Frohwalt Santifaller de Urtijëi, Margareth Forer de S. Cristina, Ingrid Crazzolara da San Ćiascian y Ivan Irsara da La Ila. La surastanza dl Consëi de Direziun à la direturia Edith Ploner.La sentada costituënta dl Consëi de Direziun dles scolines nü sarà en lönesc, ai 6 de forà dales 17.00 a la Ila.
Le Consëi de direziun à la funziun de colaborè cun la Direziun por le bun funzionamënt dles scolines, de fà propostes y tó posiziun sön tematiches che reverda les scolines.
UV
