Atualità
Durnwalder y Mussner dal Dé dla Cultura Ladina: i programs dla RAI dess gnì slarià fora y la leteratöra dess ciafè stimulaziuns nöies
LPA - Le Presidënt dla Junta provinziala Luis Durnwalder y l’assessur ladin Florian Mussner à daurì incö jöbia, ai 5 de otober, le Dé dla Cultura Ladina. Deperpo che l’assessur Mussner à anunzié n engagement plü sterch dla Provinzia tl sostëgn dla leteratöra ladina, à le Presidënt dla Junta provinziala confermè, che tratan le renovamënt dla convenziun cun la RAI, damanaràl plü na gran lerch por la programaziun locala tl lingaz ladin.
La curt daìte dl Palaz Widmann a Balsan é stada incö la cornisc dl cuarto Dé dla Cultura Ladina. Chësc iade él gnü tratè sciöche tema zentral “ert y lingaz” y le raport danter la cultura ladina y la cultura di atri dui grups linguistics dla Provinzia.“Mâ bele le fat, che le Dé dla Cultura Ladina vëgn tignì chilò Balsan, é n sëgn che i ladins se deura inće foradecà. Chësc desmostra che i ladins ne se stlüj nia ite te sües döes valades mo ch’ai chir le contat y le barat cun i atri dui grups linguistics”, chëstes é stades les parores dl Presidënt dla provinzia Luis Durnwalder te so discurs de daurida. Le Presidënt à inće sotligné, che la Provinzia à bele tut tröpes scomenciadies por assiguré le mantegnimënt dla cultura ladina. Durnwalder à nominé te chësc contest l’ejëmpl dla scora ladina cun so sistem paritetich. Mo al dess ćiamò gnì fat n vare inant: Le Presidënt dla Junta provinziala à confermè, che tla proscima convenziun cun le Stat sura la RAI, damanaràl plü na gran lerch por la programaziun locala tl lingaz ladin.
L’assessur Florian Mussner à recordè ch’al é nezesciar de mostrè na gran sensibilité por les pices minoranzes, “ćiche Südtirol nes à bele desmostrè”, y al à sotligné l’importanza dl raport danter ert y lingaz: “Le lingaz crësc y se svilupëia tres l’ert deventon insciö plü vì, deache l’ert te dötes sües formes, é le canal de comunicaziun plü sterch. Le lingaz costruësc punć danter cultura, popui y religiuns. Porchël prô la Provinzia da stimulé le lingaz y la leteratöra ladina”.
Le Dé dla Cultura ladina é gnü alternè da discurs y da momënć de descusciun y sciöch’ultima pert dla manifestaziun da na mësa torona cun protagonisć dla cultura locala. Dô i discurs tignîs dal diretur dl Museion Andreas Hapkemeyer y dl arist Markus Vallazza sura le raport danter ert y lingaz, éson jüs inant cun na mësa torona cun Andreas Hapkemair, Markus Vallazza, i artisć Thea Blaas y Philip Messner y l’aministradëssa dl Museion Letizia Ragaglia. Ala manifestaziun à tut pert n publich dl monn cultural local di trëi grups linguistics.
LPA
