Atualità
L assessëur Mussner n ucajion dl Di nternaziunel dl liber: “Lijëde libri per ladin!”
USP - N ucajion di 23 de auril 2007, Di nternaziunel dl Liber, sotrissea l assessëur per la Cultura y Scola ladina la mpurtanza dl liber per dé inant savëi, esperienzes desvalives y cultura. “I libri à la funzion de mantenì y arichì la cultura y rujeneda ladina” chësc auza ora l assessëur Florian Mussner che nvieia duta la populazion y dantaldut i jëuni a tò plu suvënz tla mans n bon liber.
“Libri ie bëns culturei de gran valor y strumënc mpurtanc per la comunicazion y l’educazion” nsci l assessëur Mussner. Te chësc cuntest auza l assessëur ora la mpurtanza dla letura. “Nchinamei i pitli popi à legrëza a ti cialé a n liber y perchël”, nsci spiega l assessëur, “fej nce l Ressort ala Cultura ladina pea pra l proiet “Bookstart” ulache l ti vën partì ora libri a families cun popsc. “La letura ti dà la puscibltà a na sozietà de crëscer y se svilupé. Datrai possa liejër nce vester sfadiëus ma l se paia for nes dé ju cun n liber ajache chësc nes gëura perspetives nueves.” L assessëur ie dla minoga che la parola scrita ie scialdi mpurtanta per la cultura ladina y ël nvieia duc i ladins a scrì. Dassën a cuer ti sta che duta la popolazion ma dantaldut la junëza lieje libri per ladin. L assessëur auza ora che l Istitut Ladin Micurà de Rü y l Istitut Pedagogich Ladin, che vën sustënii dala Provinzia, dà uni ann ora publicazions nueves, che n possa se mpresté ora tla biblioteches di istituc numinei dessëura. Nce truepa lies se dà da fé per dé ora vel’ liber. Sëuraprò a libri per ladin, vëniel ti istituc abinà adum duc i libri che à da n fé cun la rujeneda y cultura ladina.
USP
