Atualità
Höllrigl y Verra à premié i mius scolars dl concurs “I cangurs dla matematica”
6729 scolars dala terza tlassa dla scora elementara cina ala tlassa de maturité à tut pert al concurs “I cangurs dla matematica”. I intendënc' Peter Höllrigl y Roland Verra à premié incö, ai 3 de mà, i mius scolars de matematica de Südtirol.
Chësc ann él stè 1500 scolars deplü co l’ann passè che à tut pert al concurs “I cangurs dla matematica”. L’Intendënt Höllrigl vëiga chësc sciöche gran interès da pert di scolars por le ćiamp dles materies de sciënzes naturales. L’Intendënt Roland Verra à sotligné la gran importanza por les scores ladines de tó pert a concursc de confrunt sciöche por ejëmpl chësc concurs de matematica : “Por les scores ladines é l’educaziun plurilinguistica fondamentala. Al é porchël dër important de arjunje inće tles atres materies n livel alt, tres la colauraziun cun les scores ladines.”
L’idea de n concurs de confrunt de matematica vëgn dal’Australia, olach’ai à bele cherié tl 1978 le “Australian Mathematics Competition”. Maestri franzesc de matematica à portè ite le concurs tla Francia y da dailò s’àl slarié fora sura döta l’Europa.
Incö él gnü premié i mius scolars (la lista di premià è injuntada). Marta Herbst Spöttl, l’ispeturia tl ćiamp dla matematica y dles sciënzes naturales dl’Intendënza à splighé les modalitês dl concurs:”A vigni scolar ti él gnü fat 30 domandes y vigni domanda â cin soluziuns poscibles. Ma öna de chëstes ê dërta. Por vigni resposta dërta ciafâ le scolar 3 punć y por les respostes falades gnôl trat jö n cuarto de chisc punć por evité che le scolar stomass mâ. Por respogne ales 30 domandes, â i scolars 75 menüć a desposiziun.”
Le concurs “I cangurs dla matematica” ne promöi nia, sciöche la olimpiada dla matematica, i talënć di scolars mo so fin é chël de descedè ti scolars l’entusiasm por la matematica, dij l’Intendënt Höllrigl.
USP
