Atualità
L’ultimo toch dl tunel “Punt de Fer” sön la strada statala dla Val Badia é gnü sbujé
L’ultimo toch dl tunel “Punt de Fer”, dla varianta dla strada statala dla Val Badia (SS244), tl chilometer 23,1, é gnü sbujé sön le tert domisdé, incö ai 03 de mà. Presënt ê l’Assessur por i laûrs publics Florian Mussner.
Por tignì fora la ôta strënta dla strada statala atuala dla Val Badia SS244 a nord de Pedraces, vëgnel costruì na varianta che mët man tl chilometer 2,4 y che é formada da n tunel fora por la falzada de pera tl chilometer 23,1 che à na lunghëza de 422 metri. Le toch de strada nü passa sura n punt nü de 47,7 metri y arjunj la strada esistënta tla pröma ôta do le punt.
L’ultimo toch dl tunel “Punt de Fer” é gnü sbujé incö söl tert domisdé. Presënć ê l’Assessur Florian Mussner, aministradus locai y tecnics.
L’Assessur Mussner é cuntënt cun la situaziun di laûrs dla costruziun dl tunel y dl punt nü; al se trata de opres de prescia por ti garantì plü segurëza ai abitanć dla Val Badia, y dantadöt ai abitanć dla valada alta. Tles ores de gran trafich él 15.000 mesi de trasport che passa sön chësc toch de strada.
I detais y les carateristiches tecniches dles costruziuns nöies é gnüs ilustrà dal ing. Gustav Mischi, diretur di laûrs.
Tl tunel y sön le punt nüs à la strada döes corsies de 3.50 metri l’öna y dui marciapîsc de 0,85 metri l’un. Le tunel à n’altëza minima de 5 metri.
I laûrs de costruziun dl tunel y dl punt à metü man ai 19 d’aurì 2006 y ai gnarà stlüć jö ai pröms de jenà 2008. I cosć dla costruziun fej fora na soma de 5,678 miluns de euro.
USP
Galaria dales fotografies
