Atualità
Secunda ediziun dl concurs a pesc "Auturs ladins scrì …”
USP - L’Ufize cultura y scora ladina dla Provinzia Autonoma de Balsan-Südtirol lascia al savëi che al è gnü bandì la secunda ediziun dl concurs a pesc “Auturs ladins scrì …”.
Ara se trata de n pest por la realisaziun de operes che á da fa cun l monn cultural ladin. Dötes les operes mëss ester scrites por ladin de Gherdëna o dla Val Badia, y ester mai stades publicades. Stlüć fora é les teses de laurea, tesć scientifics, traduziuns y copies de opres bele publicades te d’atri lingac. Lasciades pro al cuncurs é inće opres liriches, metüdes adöm da almanco cin’ rimes.
Al vëgn scrit fora chisc pesć: le pest “ Auturs Ladins Scrî..y le pest Auturs Ladins Scrî…(Seziun Jogn) por auturs jogn che ne n’à nia plü co 30 agn. Düć chi che tol pert mëss avëi cumplì i 18 agn.
Por vigne seziun vëgnel nominé 1 davagnadù. Chisc po piè do i pesć tla manira suandënta: pröm pest 3.000 Euro y publicaziun y promoziun dl laûr, pröm pest (Seziun Jogn) 3.000 Euro y publicaziun y promoziun dl laûr.
Presidënt dla iuria che ejaminëia les operes é Prof. Paul Videsott, dozënt ala Universitè Lëdia de Balsan, colaboradù de comitês scentifics, autur de tröpes publicaziuns y premié cun varies onoranzes. I atri componënć dla iuria é: Rut Bernardi, Tone Gasser, Marco Forni y Ida Valentin.
I laûrs mëss gni surandà por l 31 de jenà dl 2008.
Informaziuns plü avisa dá fora l’Ufize cultura y scora ladina sot l numer de telefon 0471 417020 o 0471 417021. Les informaziuns po ince gni desćiariades jö da internet sot www.provinz.bz.it/intendenza-ladina/cultura-ladina o damanades cun e-mail a alexander.piccolruaz@provinz.bz.it o barbara.perathoner@provinz.bz.it.
SAN
