Atualità
L Assessëur Mussner ie Sëurastant dl cumité de coordinazion per ativiteies cultureles che va sëura la grupes de rujeneda ora
USP - Per l prim iede ie śën cun l Assessëur Florian Mussner n ladin sëurastant dl cumité de coordinazion per ativiteies cultureles y artistiches y scumenciadives che reverda la trëi grupes linguistiches. „Tres l lëur dl cumité che se cruzia de sustenì proiec che va sëura i cunfins ora, vëniel purtà pro a na cunvivënza pazifica dla cultures“ sotrissea Florian Mussner.
L cumité per l sustëni de ativiteies intercultureles ie bele n vita dal 1958. L se dà ju cun scumenciadives cultureles che reverda duta la trëi grupes linguistiches te Südtirol, ma nce cun scumenciadives metudes a jì da urganisazions cun cumëmbri de duta la trëi grupes linguistiches. Per i proiec defrënc presentei possa l cumité dé n bensté per cuntribuc finanziei. La Jonta provinziela dà pona i cuntribuc.
Da juni ie l Assessëur ladin l sëurastant de chësc cumité. Nchin śën univa l gremium menà dal Assessëur per la cultura taliana, Luigi Cigolla, che resta reprejentant tl cumité sciche nce l’Assessëura per la cultura tudëscia. Pra l cumité de coordinazion toca oradechël na lingia de persones espertes ti ciamps dl’ert, dla mujiga y dl teater.
L Assessëur ladin Florian Mussner, che cherderà ite proscimamënter la prima senteda dl cumité se ncunforta sun si ncëria nueva: „Tres chësc lëur purtons pro a sustenì la cunescënza dl’autra cultures y a renfurzé la cunlaurazion danter la jënt de Südtirol. Proiec culturei metui a jì deberieda cun l’autra grupes linguistiches ncurajea a pensé sëura sun si cultura, chëla che n à nstësc, y chëla di autri. L’ancunteda dla cultures ie de mpurtanza, ajache se ancunté uel nce dì dialoghé, rujené cun i autri, dij l Assessëur Mussner lecurdan nce i truep proiec de film, teater, mujiga y ert nteressanc y costrutifs che vën bele fac ncueicundi.
USP
