Atualità
20 ani Istitut Pedagogich Ladin – Assessëur Mussner: “L’Istitut à fat n gran lëur“
USP - Ai 30 de Juni, dan avisa 20 ani, ie l Istitut Pedagogich Ladin unì metù su tres na lege provinziela. L Assessëur Mussner ulëssa nuzé chësta ucajion, per sotrissé la mpurtanza de chësta istituzion per la scoles ladines. „L IPL à acumpanià la scoles y la scolines te si svilup y les à sustenides dassënn tl ciamp dla didatica“, dij l Assessëur.
Mussner dij inant che i Ladins ne à nia sciche la autra doi grupes de rujeneda n „Hinterland“, che po’ les sustenì ti ciamps dla rujeneda y dla didatica. Nce l sistem scolastich plurilingual che à la scoles ladines pertënd na didatica y material de nseniamënt aldò. Mussner lauda l Istitut dijan: „L IPL à dant al dut fat n gran lëur tl ciamp di libri de scola y de auter material didatich per scoles y scolines“. Ti ultims ani à l IPL dat n gran pëis a la didatica ntegreda dla rujenedes a na maniera che la rujenedes posse se jude una cun l’autra.
N gran sustëni tres l Istitut Pedagogich Ladin à giatà la scoles y la scolines tres i programs de furmazion y de ajurnamënt che l IPL à metù a jì ann per ann. „N gran pëis ti an dat ala puscibeltà de ajurnamënt tl ciamp dla rujenedes, ulache n à urganisà i sustenì nce cursc ora dla valedes te ziteies talianes, tudësces y nglëijes“ spliega l Diretëur dl IPL Theodor Rifesser.
Nce tl ciamp dla documentazion y dla nrescides à l Istitut da mustré su de bon resultac, ajache - nce sce l numer di culaburadëures dl Istitut ie plutosc pitl - iesen stac boni de dé ora te chisc 20 ani l bel numer de passa 100 publicazions.
Da canche ie unida metuda su l’Università a Persenon cëla l IPL de avëi na bona culaburazion cun la Facultà de Scienzes dla Furmazion che njinia ca al didancuei i maestri per la scoles ladines. L Diretëur dl IPL ie nce dirijënt dla Repartizion Ladina a Persenon, che à giatà da puech na catedra de Ladinistica, curida dal Prof. Paul Videsott, che fej nce pert dl Directorium dl IPL. Chësc liam dopl garantësc la medema vijion tla furmazion dla studëntes y l medemo pont de ududa tla metodologies dl nseniamënt.
L Assessëur Mussner rengrazia l Istitut Pedagogich Ladin per l gran lëur fat fina śën y ti mbincia nce n bon lëur per l daunì.
l Istitut Pedagogich Ladin ie giuridicamënter na Istituzion autonoma dla Pruvinzia de Bulsan che sustën la Scoles Ladines te si svilup y cëla de auzé la cualità dl nseniamënt. L IPL ie da una na pert na Istituzion scientifica y da l’autra pert na Istituzion de servisc per l Guviern provinziel, per l’aministrazion dla scoles, per la scoles y la scolines y per duc i maestri y nsenianc.
USP
