Atualità
Forum cultural ladin: la domanda por les scores de musiga crësc
(USP) En sabeda ai 20 de otober s'à döt rodè incër la musiga al forum cultural de Sëlva. Laprò él gnü constatè che l’interès por la musiga y por na formaziun musicala crësc de manira costanta y la domanda do posc´ tles scores de musiga superëia intratan l’oferta.
Vigni ann organisëia la Repartiziun Cultura Ladina, le forum cultural dediché ann por ann a n ater argomënt. Chësc ann ê la musiga le punt zentral dl forum y chësc te sües formes plü desvalies. Insciö à l’Assessur Florian Mussner recordè che la musiga é n lingaz universal, che vignun capësc. „Porchël dess vignun avëi la poscibilité de se formè musicalmënter“, insciö l’Assessur.
Sciöche al é gnü azentè da esperć tla cornisc de na mësa torona, é la domanda por na formaziun musicala por le momënt maiù dl’oferta. Ma te Gherdëna, él stè 124 scolars che à messü chësc ann renunzié a n post tla scora de musiga. Impò ne se lascia l’entusiasm nia arferè: „Nos ùn 13 musighes tles valades ladines, sciöche inće 34 cors y le numer di CDs ladins che röia sön le marćé é inće en aumënt costant“, insciö à l’Assessur Mussner azentè.
L’argomënt é spo inće gnü conscidré sot a döt n’atra löm: la terapia musicala.
Sciöche al é gnü sotligné dala pedagoga de musiga Heidi Stuffer te so referat, é la musiga porchël n dër stromënt de terapia, ajache ara n’un va nia de abilitês, mo plütosc dl’espresciun de sentimënć y de comunicaziun. „ La musiga indespra recorć, smendrësc tëmes y renforza l’identité“, à sotligné Stuffer. Laprò é la musiga bona da formè lians, olâ che le lingaz ne basta nia o olâ che ël ne vëgn nia adorè. La terapia musicala vëgn porchël adorada pro porsones cun de gran desturbs de svilup, por ejëmpl pro porsones autistes, mo inće pro porsones che se stënta a mostrè sü sentimënć.
USP
