Atualità
L’Assessur Mussner s’incunta cun rapresentanc di Ladins de Suramunt
USP - Na delegaziun dl Istitut Cultural “Cesa de Jan” de Col é rovada adalerch ai 7. de forà a San Martin de Tor por s’incontè cun l’Assessur Ladin Florian Mussner. “La colaboraziun danter Ladins ti ciamps dla scola, cultura y ert dess gní intesivada y jí sura i confins dla Provinzia fora” inscö Mussner.
L’intenziun dl Assessur Mussner é chëla de amplié ćiamò deplö l laûr fat deboriada tl ćiamp dla cultura y dla scola danter i Ladins. Chësc ti à assiguré Mussner a Moreno Kerer, diretur dla “Cesa de Jan” y Nani Pellegrini, presidënt dl Istitut Cultural di Ladins de Suramunt. “ Düć i Ladins dess avëi i medemi dërć y les medemes poscibilitês. N vare de gran importanza te chësta direziun é la colaboraziun ti ćiamps dla cultura y dla scola”, dij l’Assessur Mussner.
Tratan la vijita a San Martin de Tor à Kerer y Pellegrini inće vijité la sënta nöia dl Istitut Cultural “Micurà de Rü”. L diretur y l presidënt dl Istitut Leander Moroder y Hugo Valentin á dé informaziuns sura la strotöra y i proieć culturai. Alexander Prinoth y Alex Piccolruaz dla Ripartiziun Cultura y Scola Ladina á dè informaziuns sura proieć y programms de scola y cultura dla Provinzia.
Ti agn passà el inće bel sté na colaboraziun danter i dui istituì culturai de San Martin y Col. L diretur dl “Micurà de Rü” Leander Moroder fej pert dl Consëi Scientifich dl Istitut “Cesa de Jan”.
Por podëi lié ćiamò plö adüm i dui istituć culturai à Mussner fat la proposta, che n ladin de Suramunt dess fá pert dl Consëi Scientifich dl Istitut “Micurà de Rü”. I rapresentanć de Fodom, Col y Ampëz nominarà por la fin de merz na porsona. L Istitut “Cesa de Jan” arà inće la poscibilité de anuzé la banca dates dl “Micurà de Rü. “A chësta moda pon sfrutè sinergies”, dij l’Assessur Mussner.
Sura düt tl ćiamp dla scola mëssun laurè deboriada, sotlignëia Mussner. “I scolari y les scolares di comuns de Suramunt dess avëi la poscibilitè d’imparé l lingaz dla uma te scola y scolina”. “Por chësc fin urun tó ite i Ladins de Suramunt tl laûr dl Istitut Pedagogich Ladin y mët a desposiziun l’esperiënza tl ćiamp dles publicaziuns”, inscö l’Assessur.
Al ti dess inće gni de plö lerch al ladin de Suramunt tles trasmisciuns dla RAI. La trasmisciun “Scenar” che vëgn sostignida dala Provinzia trata bel sëgn tematiches che reverda i ladins de Fodom; Col y Ampëz.
USP
