Atualità
Se sintì ladins tl monn
USP - ladin Florian Mussner söl Ju de Frara le vizepresidënt dla Lia di Comuns ladins Paolo Frena, l’ombolt da Fodom Gianni Pezzei y l’assessuria da Cortina d’Ampëz Paola Valle por definì deboriada n proiet che lieia adöm i ladins dles cin valades incër le Sella che vir fora dles trëi provinzies. Invià ala sentada ê ince l’assessur regional Luigi Chiocchetti y le presidënt dla Lia di ombolc’ ladins Bruno Senoner che n’à nia podü tó pert.
“Ladins tl monn” dess ester le titul dl proiet cultural-sozial che se tol dant i fins de renforzè l’identité ladina de “chëres porsones che à lascè süa tera ladina por gaujes desvalies y che vir sëgn ti atri paîsc y continënc dl monn. Propi chëstes porsones chir n liam cun so paîsc nadè y é interessà a so svilup cultural, sozial y economich y nia en ultima dl lingaz ladin”, dij l’assessur Florian Mussner. Dilan ales tecnologies nöies dla rëi telematica pol gnì cherié na plataforma te chëra che chisc ladins interessà po s’incuntè, imparè da se conësce, se baratè fora esperiënzes, s’informè y ince se daidé. “Chilò ponsunse a düc’ i ladins de vigni eté y categoria soziala che vir demez”, dij inant l’assessur ladin.
Chësc sentimënt de liam y unité renforzëia y mantëgn sterscia la cosciënza ladina, propi sciöche chëra de na mendranza che à sües raîsc stersces che caraterisëia la persona por döta süa vita. Suradöt te n monn tres plü globalisé chir la porsona sües raîsc por ne jì nia sot te n sistem che ô cherié tres na majera uniformité. Propi i ladins à le bojëgn da se sintì lià adöm, deache la storia à fat süa pert por i despartì. “Chësc é ince un di fins che la Lia di ombolc’ ladins se tol dant, sciöche preodü dala lege 482/99”, dij l’ombolt de Col y vizepresidënt Paolo Frena. I presënc’ é dla convinziun che la rëi di ladins tl monn dess gnì metüda pro na istituziun che laora bel por la cultura ladina. Sciöche portadù competënt él porchël gnü ponsè al ofize por la cultura ladina a Balsan che fej pert dl assessorat ala scora y cultura ladina.
Dër cuntënc’ de chësta proposta s’à desmostrè ince i atri rapresentanc’ di comuns presënc Paola Valle y Gianni Pezzei che l’arata n proiet de gran sensibilité suradöt ti confrunc’ di Comuns de Suramont che s’à bele fat pinisers söl co tò sö contac’ cun sü compaejagn che vir foradecà.
L’assessur Mussner é dassënn cuntënt dla disponibilité y dl sostëgn che ti vëgn desmostrè a chësta iniziativa. “Ma tres na buna colaboraziun él poscibl avëi suzès te chëstes scomenciadies”. Sön chësta fondamënta gnaràl laurè inant por podëi presentè le proiet ciamò en chësc isté.usp
