Atualità
De plu sculeies tla scoles autes ladines
USP - Per l proscimo ann de scola se à scrit ite 360 sculeies tla scoles autes dla Val Badia y de Gherdëina. Permez al ann passà iel stat n aumënt de belau 4% cumpedan adum la iscrizions dla cater scoles. L assessëur ladin Florian Mussner manda n apel ala populazion de se nuzé dla scoles autes ladines che à giapà de bona valutazions.
Da permò iel unì stlut ju la iscrizions per l proscimo ann de scola y riesc an udù che la cumpëida di sculeies tla scoles autes ladines jirà suvier. Ntan chësc ann de scola iel 347 sculeies tla scoles autes, n auter ann nen saral 360 che fej ora n aumënt de 3,7%.
L aumënt de ndut ie unìt a se l dé scebën che tl Lizeum Linguistich a La Ila ne unira n auter ann nia a se l dé na prima tlas. Na tel situazion fovel nce stat dan trëi ani, perchël manceral n auter ann nce la cuarta tlas tl Lizeum.
“Chësc ie dassënn sciot y purterà n problem tl daunì” à dit l assessëur ladin Florian Mussner. I diretëures ie tl lëur de mëter a ji proiec nueves per vester plu atratives per i sculeies. “Cialon de abiné na bona forma tl cheder dla 20 ëures dl’autonomia dla scoles, nscì pudëssen mantenì l Lizeum a La Ila, spiega l diretëur de ripartizion Alexander Prinoth.
“La scoles ladines à nce tres l studi Pisa giapà de bona valutazions che testemunieia che les ie de bona scoles. Feji n apel a duc i sculeies de nosta valedes de se nuzé dla pusciblteies che pieta la scola ladina” nscì l assessëur Mussner. La scola ladina ie la sëula che pieta na bona furmazion te duta trëi rujenedes de nosta provinzia.
Tl Istitut tecnich y tl Lizeum linguistich a La Ila saral n auter ann de ndut 100 sculeies. Tla prima tlas dl Istitut tecnich se à scrit ite 11 sculeies.
Tla doi scoles a Urtijëi saral tl proscimo ann de scola de ndut 260 sculeies. Tl Istitut Raetia se se à scrit ite 31 sculeies nueves, tla Scola d’Ert 25. L ann passà ova la scola auta Raetia abù truep nteres per la prima tlas, n fej cont che 46 passerà per n auter ann tla segonda. La cumpëida per la primes da n auter spiedla perchël ino la media di ani dant.
N cont de sculeies da oradeca à la cësa nueva di studënc Assudëi dessegur judà a miuré l servisc. Per n auter ann iel stat 20 sculeies che à damandà de n post. Trëi per la scola Raetia y 17 per la Scola d’Ert. Aldo de na cunvenzion danter la gestion, chemun y provizia ti vëniel tla cësa di studënc dat priorità a chëi che fej la prima y segonda tlasses. Per n auter ann uniral fat lëures per junté mo 12 liec tla cësa per studënc y n ruverà scì a nca cumpëida de 53 studënc de ndut.
as
