Atualità

Scora / Cultura | 16.06.2008 | 11:24

Iaco Rigo y Ivan Senoner vënc l cuncors de leteratura

USP – Opres letereres juda a arichì y ti dé vita ala rujeneda. Cun chësc pensier a l’Assessorat ladin metù a ji la segonda edizion dl cuncors leterer “Auturs ladins scrî…”. Iaco Rigo y Ivan Senoner, tla categuria jëuni, à venciù l prim pest. Si opres unirà publichedes y prejentedes pra la premiazion d’autonn.

Cun l’opra dal titul “Verjiun de n caprize” à Iaco Rigo da la Pliscia venciù l prim pest dl cuncors leterer. Tla categuria di jëuni sota 30 ani à Ivan Senoner abù suzes cun l opra “Tré l’ega”. Sciche pest unirà chësta doi opres publichedes y sëuraprò giapa tramedoi autores n pest de 3.000 Euro. L cuncors fova uni scrit ora l ann passà d’instà y chisc dis se à la giuria ancuntà per valuté l’opres.

Do l’esperienza dl prim cuncors leterer, scrit ora dl 2004 an ulù ji inant cun chësta scumenciadiva per sustenì dantaprima i jëuni a scrì te si rujeneda dl’oma. L nteres di autores ie cresciù dassënn tla segonda edizion y chësc ti dà rejon ala scumenciadiva. “Cun l cuncors ons pudù motivé autores de nosta valedes à dé esprescion a si pensieres, fantajies y emozions tla rujeneda dl’oma. L’opres di autores ie da si pert n bel cuntribut che ti dà vita ala rujeneda ladina” à dit l assessëur Florian Mussner. Cumplimënc ti manda l assessëur a chëi che à venciù, ma nce a duc chëi che se a dat jù a scrì n opra leterera tla rujeneda ladina.

Per dé na valutazion di pec scric iel unì nvià na giuria de cin persones de esperienza y cumpetënza tl ciamp. Dat ca se à tlo Paul Videsott sciche presidënt de giuria, Marco Forni, Rut Bernardi, Ida Valentin y Tone Gasser. Do avëi liet tres i pec mandei ite, à duta la giuria pudù cunstaté che l livel ie drët aut. Chëst iede iel nce unì dat ju vel pez lirich, dessegur na forma mo plu ria da scrì dal pont de ududa leterer.

Scrì opres letereres dà sambën plu sodesfazion sce les vën nce publichedes. Davia che l marcià ie plutosc pitl, ne ie chësc tl cajo dla rujeneda ladina nia tan saurì. L Assessorat Ladin, tres l Ufize Cultura ladina dajerà ora na publicazion dla doi opres che à venciù l cuncors dajan nscì ucajion al publich de cunëscer chësta opres nueves. Chësta publicazion unirà prejenteda n ucajion dla premiazion ufiziela d’autonn.
Ntan l’instà uniral scrit ora n cuncors de ert figurativa per artisć dla valedes ladines. L argumënt ie ispirà al ann comemoratif 2009 y ie dedicà a eroes y eroines. Plu inant iel inò udù dant de scri ora la terza edizion dl cuncors leterer “Auturs ladins scrî…”.

as

Galaria dales fotografies