Atualità
Reunion dla scoles ladines sun l Decret Gelmini
USP - N vënderdi ai 19 de setëmber se anconta i diretëures dla scoles y dla scolines ladines a San Martin de Tor per rujené dla nuviteies che l guviern de Roma à udù dant per la scoles.
Duman mierculdi, 17 de setëmber se anconta n iede reprejentanc dla trëi ntendënzes per la scoles dla Provinzia de Bulsan per fé ora la posizion da tò ite n cont dla nuviteies sun la scola dl decret Gelmini.
Tl’ancunteda de San Martin uniral stlarì coche la scoles à da se cumpurté n cont dla valutazions dezimales tla scoles elementeres y mesanes, dla valutazion dl cumpurtamënt, dla materia “Zitadinanza y Costituzion” y dl nseniant unich tla scola elementera.
Chisc argumënc fundamentei per nvië via l ann de scola unirà tratei a fonz cun l Ntendënt dut. Roland Verra y dal diretëur de Repartizion dut. Alexander Prinoth.
L unirà purtà dant la soluzions che la Provinzia de Bulsan possa crì tl cheder de si autonomia per straverde l sistem scolastich local y varenté la arjontes pedagogiches de chisc ultimi ani.
as
