Atualità
Viac dl maië: publicazion dl Arge Alp sun internet
USP – N viac danter la spëisa di luesc da mont: spätzle dl Allgäu, crafuncins o strigoli da cujiné do. Chësc ie chël che la cumenanza di raions da mont Arge Alp pieta da nuef sun si plata internet. Sëuraprò ala rezetes iel nce da abiné nfurmazions sun la varietà dl maië di luesc da mont.
Per nteressei ala spëisa di luesc da mont ie la nueva plata internet dla Arge Alp la drëta: sota www.argealp.org/projekte/kochbuch/kulinarischereise/ iel publicà rezetes tipiches che n possa cujiné do cun i prudoc tipics di regions da mont. Leprò iel nce cunsëies per l vin che passenea leprò. Na bele pert de cultura dl maië fej nce ora l ntëur via dla defrënta spëisa, nce chësta pert dl maië ie da abiné sun la nueva plates web.
La rezetes ie publichedes tla rujeneda tudëscia y taliana. Mplu possen nce ti cialé al liber dal titul „Kulinarische Köstlichkeiten ohne Grenzen – Traditionelle landwirtschaftliche Produkte aus den Arge Alp Ländern“, che ie unit ora dl 1999.
L’Arge Alp ie la cumenanza danter Bayern, Grijons, Lombardia, Salzburg, St. Gallen, Südtirol, Tessin, Tirol, Trënt y Vorarlberg. La ie stat la prima cumenanza sëura i cunfins de stat y à nce cuntribuì a na cuscienza dla regions tl’Europa. Da canche l’Arge Alp fova unida metuda su l ann 1972 se mpënia i cumëmbri per n svilup che dura tl daunì per si ncësa. La presidënza che vën data inant ann per ann, ie al mumënt sota la Provinzia de Bulsan.
as
