Atualità
Culaburadësses dla scolines ladines anjeniedes per cumpetënzes nueves
USP – Culaburadësses pedagogiches dla scolines ladines ie chisc dis tl lëur de stlù ju na furmazion de trëi ani per se adaté al cheder prufesciunel nuef. La cualificazion sëuraprò à aldò dla respunsables dla scolina ladina bele purtà fruc tl lëur da uni di cun la pitla mutans y i pitli mutons.
Dan trëi ani à 36 culaburadësses pedagogiches scumencià la furmazion sëuraprò. N lunesc y merdi de carnescià à la 16 culaburadësses de Gherdëina fat l ultimo de 14 modui de furmazion tla scolina de Sëlva. N juebia y vënderdi, 18 y 19 de fauré, uniral tla scolina de La Val tëut tres l ultimo modul. 20 educadësses dla Val Badia se dajerà ju cun la tematica dl dësseni di mëndri y la culaburazion cun la families.
L cheder prufesciunel nuef dla culaburadësses pedagogiches te scolina vëija dant na majera culaburazion pedagogica cun l’educadësses y aiuc tla documentazion di vares de svilup di mëndri. Tres la furmazion scumenceda dl 2007 à la culaburadësses pudù mparé la teoria n referimënt ala pratica n cont de pedagogia, psicologia dl svilup y l lauré adum cun la families. A chësta maniera se adateien tla scolines ladines a chël che ti vën damandà ala culaburadësses pedagogiches tres lege. “Jan tla grupes é bele pudù udëi de gran vares inant n cont de cuscienza y prufesciunalità. L’ecudadësses prugramea l’ativiteies aldò de cie che les à mparà leprò, les sa plu avisa ciuldì fé ativiteies spezieles y se fej nce plu saurì a capì cumpurtamënc di mëndri” spiega la diretëura Hannelore Insam.
Per la fin de merz messerà la 36 culaburadësses dé ju l lëur scrit sun una dla tematiches tëutes tres y purté dant de si aplicazions pratiches tl lëur.
Do trëi ani de furmazion an tla scolines ladines arjont na cualificazion dla cumpetënzes che ie unides damandedes da nuef ala culaburadësses. Tla scolina dëssa la mutans y i mutons fé damat ma nce mparé velch. “Tan bën che chësc garata depënd nce truep da coche l’ativiteies vën anjeniedes ca. Ala fin de chisc modui de furmazion me fejel plajëi che pudon ti pité mo n miëur servisc a nosc pitli” se ncunforta Edith Ploner, ispetëura dla scolines ladines.
as
