Atualità
Ai 4 de merz prejentazion dl film sun i ladins ntan l XX secul
USP - L 20esim secul à tucà particularmënter i ladins, sibe la persones che nce la cumenanza. La prima viera mundiela à purtà batalies sun la dolomites, l fascism à spartì i ladins y la catastrofa dl’opzion à purtà melcuntentëza y desperazion. Ala jënt ladina ntan chësc secul iel dedicà n nuef film documenter. L Presidënt Durnwalder y l assessëur ladin Mussner nvieia ala premiera ai 4 de merz a Bulsan.
I testemonesc dl centené che ti à tenì permez ala jënt ladina ie tl lëur de murì ora. Tl film documenter de doi pertes vëniel mustrà su l destin dla populazion ladina ntan la doi vieres. Anita Lackenberger y Gerhard Mader à ntervistà testemonesc de na vita ntravaieda, de esil ntan la vieres, de ciaresties, se duré fam y de truepa aventures. L film sun l destin dla populazion ladina ntan l ultimo secul ie unì fat sun ncëria dla Region Trentin-Südtirol n culaburazion cun la Provinzia de Bulsan, Rai de Bulsan y la firma Produktion West.
L Presidënt dla Provinzia Luis Durnwalder y l assessëur ladin Florian Mussner nvieia ala premiera dl film tla rujeneda tudëscia „Das Ladinische Jahrhundert“
n juebia ai 4 de merz 2010
dala 18.00 tl Filmclub de Bulsan,
streda Streiter 6.
Do la premiera uniral mo pità velch da pestlé.
as
