Atualità
12 y 13 de merz per ti cialé ala Scola prufesciunela de Urtijëi
USP – Doi dis per jì a cialé y purvé a depënjer, mudelé o ziplé: chësc pieta la Scola Prufesciunela per l artejanat artistich ai 12 y 13 de merz. I dis de porta davierta per sculeies y families scumëncia bele la sëira dant cun na descuscion publica sun la furmazion y marcieies dl artejanat artistich de Gherdëina.
Per sculeies che fina la scola mesana pieta la Scola prufesciunela a Urtijëi na furmazion per mparé l mestier da scultëur y moler. Sculeies possa tlo fé un, doi o trëi ani de scola y pona finé via cun n diplom prufesciunel per l artejanat artistich. Per chiche à bele arjont l ejam da fant, vëniel nce pità na scola da moster de doi ani. La materies de referimënt ie nce tlo l mudelé, depënjer o ziplé. Chësta furmazion pieta sëuraprò la fundamënta per pudëi fé l ejam da moster.
N vënderdi y sada 12 y 13 de merz possa sculeies, genitores y nteressei vijité la scola prufesciunela te si sënta nueva. Particularità de chisc dis dla porta davierta ie che n possa nce purvé a mudelé, depënjer y ziplé. “Nosta scola prufecionela pieta nce l’assistënza ndividuela di sculeies per judé a abiné n stil artistich persunel” spiega l diretëur Julius Senoner.
Sun la furmazion y i marcieies dl artejanat artistich de Gherdëina uniral la sëira dant tenì na descuscion. N juebia ai 11 de merz rujenerà l vizepresidënt dl LVH Gert Lanz, l presidënt dl artejanat artistich tl LVH Norbert Insam, l presidënt de Gardena Art Egon Bernardi, l artist Aron Demetz, l ferlëigher Konrad Piazza y l diretëur de scola Julius Senoner. Da dedò mustrerà Albert Moroder Sodlieja na documentazion fotografica de vedla berstotes te Gherdëina. La sëira tl’aula magna dl zënter scolastich scumëncia da mesa la nuef da sëira.
Ai 12 y 13 de merz gëura la Scola prufesciunela tla streda Rezia 295 a Urtijëi, si portes dala 9.00 ala 12.00 y domesdì dala 14.00 ala 17.00.
as
