Atualità
"Forumtheater A.H.10" ai 12 de merz a Urtijëi
USP – “Wer rettet die Helden?” sota chësc titul se prejënta l Forumtheater Andreas Hofer 2010 n vënderdi ai 12 de merz a Urtijëi. L pez trata de argumënc esistenziei y dassënn umans tenian cont dl cuntest storich, nvian tl medemo tëmp l publich a fé pea. L Forumtheater ie na scumenciadiva dl Ufize provinziel per la furmazion.
Nce sce l ann de cumemorazion dla batalies de liberazion ie unì stlut ju, dëssa chësc ann plën de scumenciadives purté nce fruc tl daunì. De chësc vies ie nce pensà la scumenciadiva dla Repartizion provinziela per la cultura che dà mpulsc da pensé do sun valores y manieres de pensé tres la Forumtheater. Tla reprejentazion che sarà nce da udëi a Urtijëi ie la pert storica tl zënter, nce sce l vën al lum argumënc esistenziei y umans sciche l unì a se l dé dla nsurezion, la miseria nterna de eroesc y dla persones che se à lascià zaré pea.
L Forumtheater dal titul "Wer rettet die Helden?“ vën purtà dant n vënderdi 12 de merz tl zënter per Jëuni, ert y cultura a Urtijëi, cun scumenciamënt da mesa la nuef da sëira. Do che l ie bele stat de pu reprejentazions tla ziteies, sarà chësc pez mo da udëi ai 19 y 20 de merz a Lana y Schlanders.
La rejia dl pez ie cureda da Henrique Köng. Sun palch saral Martin Abram, Donatella Gigli, Maria Hofer, Oswald Hundegger, Simon Kostner, Giulia Parisi, Hans Karl Peterlini y Lore Weis Meraner mit. La direzion dla mujiga se à sëurantëut Simon Kostner y Regula Maria Julen. L test ie de Hans Karl Peterlini.
L forumtheater ie nasciù ti ani 1960 y tol demez la sëida danter palch y publich. La jënt dëssa fé pea sun palch y mudé scenes. A chësta maniera vëniel a se l dé na maniera nteressanta de se de ju cun situazions de cunflit y problems dla vita.
as
