Atualità
Le foliet „Bote von Tirol und Vorarlberg“ tl archif digital di foliec dla Teßmann
USP - Le archif digital di foliec dla Biblioteca provinziala Friedrich Teßmann contëgn sëgn ince le foliet „Boten von Tirol und Vorarlberg“ che é gnü digitalisé deboriada cun les biblioteches de Vorarlberg, Tirol y dl Trentin por ci che reverda i agn 1813-1919.
Le foliet Bote von Tirol und Vorarlberg é gnü fora le pröm iade ai 2 d’otober dl 1813. Tl scomenciamënt êl tl Bote dlungia comunicaziuns ofiziales y anunzies inće notizies dal intern y dal èster. Naôta gnôl fora un n iade al edema, y plü tert da dui a cater iadi al edema. Dl 1860 gnôl ćinamai fora vigni dé, dal 1912 incà gnôl ma plü fora cater iadi al’edema. Por ći che reverda le numer dles plates nen âl feter mai plü co cater.
Pian ia dala secunda pert dl 19jim secul vëgnel fora d’atri folieć, y a chësta moda é la pert redazionala ala fin gnüda dada sö y al é deventè le boletin ofizial dles autoritês. Sciöche „Bote für Tirol“ él ćiamò incö le boletin ofizial dles autoritês, di ofizi y di tribunai dl Tirol.
Ti pröms trënt’agn é le Bote von Tirol, stlüt fora n valgügn pici sföis edemai, le su foliet todësch te Tirol. Ara se trata de na integraziun importanta dl’archif digital di folieć (DZA) dla biblioteca provinziala sides por ći che reverda la pröma pert dl 19jim secul che le tëmp ćina dl 1919. Porchël él gnü digitalisé por i agn 1813 – 1919.
La Biblioteca provinziala de Vorarlberg à metü a desposiziun le microfilm dl Bote, la Biblioteca dl’Université da Desproch à acompagné la digitalisaziun, fat coreziuns y ajuntè les ediziuns che manćiâ deboriada cun la Biblioteca dl Ferdinandeum. I cosć de chësc proiet é gnüs partis sö te perts valies danter les trëi biblioteches nominades dessura y la Biblioteca provinziala Dr. Friedrich Teßmann. La Biblioteca provinziala à coordiné le proiet y s’à cruzié che le Bote für Tirol sides a desposiziun de dötes les porsones interessades te so archif digital di foliec. La Junta provinziala de Südtirol à sostignì le proiet tl cheder dl ann de comeraziun 2009.
L’oferta dl archif digital di folieć (DZA) vëgn amplié tresfora. Tó sö le Bote für Tirol é bele n vare devers n proiet nü: l’archif digital di foliec dl Vedl Tirol (DZAHT), te chël che al vëgn coiü adöm y metü a desposiziuns di anuzadus folieć de döt le raiun dl Vedl Tirol.
usp
