Atualità
Studi sun l sport te scola: mpurtant, ma de plu ëures
USP – “N savëi sane te n corp sane”: do chësc moto ti dà la scola gran mpurtanza al nseniamënt de sport. Per nrescì ulache l ie pusciblteies de miuramënc y de mudamënc ie unì fat n studi cun na majera nrescida. Aldò de sculeies, genitores, nsenianc, diretëures y funziuneres tla lies, ie l nseniamënt de sport dassënn mpurtant, me che l vën tenì massa puecia ëures. I resultac ie unic prejentei ncuei (25 merz) dai assessëures provinziei ala scola deberieda cun i tecnics dl ciamp.
“Nce l sport dëssa avëi si mpurtanza te scola” à sorissà Luis Durnwalder, che ie nce assessëur al sport. De mpurtanza ie per l presidënt nce dé mutivé i sculeies a jì inant tl sport nce do scola, sibe sciche atlec, che cumpaniadëures, trainer o funziuneres. I resultac dl studi ie na basa nueva y atuela per l’aministrazion che muessa tò dezijions per la scola o nfrastrutures da frabiché. L’analisa dl nseniamënt de sport te scola ie nce de utl per savëi cie che va bën o no, cie che n possa mudé o miuré. “Ne dasson nia lascé do de se mpenië tl nseniamënt de sport, tenian nce cont de tan truep che l cumporta per la sanità y l liam soziel” sorissea l assessëur ala scola ladina Florian Mussner.
“Scola y aministrazion à n gran duvier per l nseniamënt de sport, ma nce la families muessa judé pea, dantaldut cun l bon ejëmpl” à dit l assessëura Kasslatter Mur. Sport ne ie nia me cuestion de scola, nscì ie l studi unì fat n culaburazion danter la Ntendënzes, l’Università de Dispruch, la assoziazion provinziela dla lies dal sport VSS y USSA, cun nce l CONI dla provinzia de Bulsan. “Duc adum sons cherdei a tenì su y purté inant l valor dl sport te scola” à detlarà l assessëur Tommasini.
L’analisa sun l nseniamënt de sport te scola ie unida fata sun ot tematiches. Cun 4839 respostes à do la rata trueps tenì pea al nrescida. N cont dla mpurtanza ie unit ora che trëi cherc ti dà na gran mpurtanza. Aldò de Feter mesa la respostes ie una o doi ëura de nseniamënt de sport massa puech. L 20% di sculeies à detlarà che chësta ëures vën nce nuzedes per d’autra materies. Tla scoles elementeres ie na terza pert di dirijënc nia cuntënc cun la cualità dl nseniamënt. De chësta minonga ie nce doi terzi di reprejentanc dla lies dal sport. N cont de mplanc dal sport ie 71-89% cuntënc. Dantaprima tla scoles elementeres mancel njinies per fé ginastica.
Aldò di sculeies damandei ora iel debujën de adaté l nseniamënt a sporc nueves sciche l skate o l’arpizeda.
as
