Atualità
Salvé i vedli documënc dla pluanies badiotes
USP – Tla 12 pluanies dla val Badia iel truep documënc storics che testemunieia la vita soziela ti ultimi centeneies. “L ie debujën de lauré su chisc documënc, i cataloghisé y i mëter a desposizion per studi. Son tl lëur de nvië via n proiet per salvé chësta testemunianzes storiches dla val Badia” spiega l assessëur Florian Mussner.
Ti ani passei ie truepa calonies dla val Badia unides cumededes su, afitedes o nce lascedes su. A chësta maniera ie nce jic perdui truep de vedli libri y documënc che conta dla vita soziela ti seculi passei. Per mantenì i documënc che ie mo restei ie l Assessorat provinziel ala cultura ladina tl lëur de nvië via n proiet aldò. “Ulon mantenì chësta testemunianzes storiches cun l fin che nosta jënt posse mparé a cunëscer miec la situazion soziela che à caraterisà la populazion ladina ti tëmps passei” spiega l assessëur Mussner. I lëures dëssa mo scumëncé dan l instà.
A livel provinziel an udù ite l bujën de archivië ntiera biblioteches storiches che ie mo ncantëur te cunvënc, pluanies, y ciastiei. Sun sumënciadiva dla Diozeja Bulsan-Persenon vën chisc vedli documënc analisei scientificamënter y metui a desposizion per studi. Esperc cataloghisea la testemunianzes che n possa pona jì a se cialé do te na banca dac tl internet (www.ehb.it). Te n liber vëniel sëuraprò mustrà su la storia de chësta biblioteches, si ponc plu mpurtanc n cont de cuntenut y la particulariteies. Tres l liber y dac tl internet vëniel sota la coordinazion de Bruno Klammer, mustrà su n cheder generel dla biblioteches storiches.
Te chësc proiet uniral nce ntegrà la pert ladina y l lëur de cataloghisazion vën finanzià tres l Ufize provinziel per la cultura ladina. Canche an arà stlut ju la pert dla pluanies dla val Badia uniral jit inant cun chëles de Gherdëina.
as
