Atualità
Cunsulta ladina azetea proiec culturei
USP – La Cunsulta culturela ladina à tëut tres dumandes de sustëni a proiec culturei tla valedes ladines. Te si segonda senteda de chëst ann à la cunsulta provinziela dat si bënsté per paië ora cuntribuc a 40 proiec.
De fauré ova la Cunsulta culturela ladina dantaprima tëut tres la dumandes per sustëni al atività culturela. Ai 13 de mei fovel 42 dumandes per proiec culturei al orden dl di. De chisc à la Cunsulta pudù de n bënsté positif aldò dla despunibltà finanziera de chësc mumënt. Nsci iel unì azetà 40 dumandes per na soma de ndut 117.500 euro.
Per l proiet de archiviazion de vedli documënc dla pluanies dla val Badia iel unì dat pro 20.000 euro per chëst ann y la medema soma ie ududa dant per l ann che vën. “Chësc ie n majer proiet che ulon ti ani che vën nce slargë ora sun la pluanies de Gherdëina ajache l ie de gran utl per mparé a cunëscer miec nosta ravises cultureles” spiega l assessëur Florian Mussner.
Na nuvità danter i proiec che vën sustenii ie la prima edizion dl festival de teater che unirà tenì de lugio tla val Badia. Da udëi saral pec de teater prufesciunei y pec te trëi rujenedes. La scumenciadiva ie penseda per duc i pasciunei de teater tla valedes ladines no me dla Provinzia de Bulsan, ma nce per chëi de Fascia y Fedom.
Danter i proiec che giaperà n cuntribut tres l Assessorat provinziel ladin iel nce l Folk Festival che sarà ala fin dl instà a Al Plan. Di proiec culturei te Gherdëina sustën la Provinzia chëst ann danterauter la bienale de Gherdëina. L se trata tlo de na mostra artistica tl raion da jì a pe de Urtijëi me per artisć ladins. Te si segonda edizion unirà nce sustenì la scumenciadiva dl’Ena ladina te Sëlva.
I mesuns finanziei per judé a mantenì la cultura ladina vën metui a desposizion dala Provinzia de Bulsan aldò dl pruporz y vën spartì su aldò dla dumandes che vën mandedes ite. La Cunsulta culturela ladina valutea aldò dl valor culturel y dla cumpëida dla persones che fej pert de na lia o de n proiet, la mesura dl cuntribut. Presidënt dla Cunsulta ie l assessëur Florian Mussner, che fajerà pona nce i decrec acioche possa unì paië ora i cuntribuc. Cumëmbri dla Cunsulta ie mplu Hubert Irsara da La Ila y Bruno Senoner de S.Crestina. Sciche esperc dl ciamp ie Lois Ellecosta da Al Plan y Hilda Sottara da S.Martin te Cunsulta. Scrivan ie Alexander Piccolruaz dl Ufize provinziel per la Cultura ladina.
as
