Atualità
Jëuni fej n viac de studi: cuntac interculturei
USP - Per mparé a cunëscer miec la vita de cunzitadins nueves ie jëuni dla trëi grupes de rujeneda jic de viac. Tl cheder de n proiet interculturel di Ufizies provinziei ai jëuni dla trëi rujenedes, ie jëuni stai tl Albania y furnerà mo de juni tl Marocco.
I viages de studi ie pert dl azënt interculturel che i Ufizies provinziei ai jëuni à laurà ora per chëst ann. “Mparé a cunëscer la vita di jëuni iló, juda nce a capì miec chëi che vën pona a viver tlo da nëus” spiega Wilma Runggaldier dl Ufize provinziel. La se trata de mparé a cunëscer miec i migrei tlo da nëus y si mentalità. Nce chësc sesto viac de studi vën metù a jì deberieda dala trëi grupes de rujeneda. “On udù che tel esperienzes ie de gran utl per miuré i cuntac y la culaburazion” sorissea Runggaldier. Tl’Albania ie furneda na grupa de 20 jëuni, culaburadëures di Servijes ai jëuni y di Ufizies ai jëuni. L ie unì vijità zëntri per jëuni, scoles y universiteies, ma nce l port de Durres, da ulache ie muetes la prima berches de muciadives de viers dla Talia.
Ala fin de juni uniral fat l segondo viac de studi. Jëuni y culaburadëures per i jëuni furnerà a Rabat tl Marocco. Chësc viac dëssa giaurì la udleda sun la cultura arabica-marocchina.
as
