Atualità
44 maduranc tla scoles ladines
USP – N merdi ai 22 juni, scumëncia nce tla scoles autes dla valedes ladines la matura. Permez al’autra scoles, messerà i candidac per la matura paritetica fé na prova scrit de plu. Ai 44 sculeies y sculees tla val Badia y te Gherdëina, ti mbincia l assessëur ladin Mussner dut l bon per chësc ejam mpurtant.
Te trëi scoles autes de Gherdëina y Badia scumëncia ai 22 l ejam de matura per de ndut 44 sculeies. De manco permez al ann passà, che cun 60 candidac fova stat n an ora de mesura.Tl Istitut tecnich Raetia a Urtijëi, la majera scola auta ladina, iel cun 21 sculeies nce la majera cumpëida de maduranc: 10 tla sezion cumerziela IGEA y 11 tla sezion turistica. Per la matura cumerziela IGEA a La Ila se prejenterà 16 candidac y 7 candidac per l ejam de stat tla scola d’ert a Urtijëi.
Permez ai ani passei iel me de pitla mudazions tl sistem de dé i ponc dla matura. Sun na cumpëida mascima de 100 ponc, à daniëura la cater proves scrites l majer pëis cun al plu 45 ponc. Da nuef iel che 5% di ponc ie unic spustei dala prova a usc de viers dl credit furmativ che i sculeies tol pea dala cin tlasses de scola auta. Per giapé la valutazion mascima dl 100 cun lauda iel debujën avëi abù ti ani passei la media dl 8.
Deberieda cun l diplom de matura, uniral per l prim iede nce dat ora na zertificazion dla cumpetënzes te chëla che l sculé giapa na descrizion dl livel arjont te na forma damandeda y recunesciuda a livel de Europa. “Sëuraprò al savëi, mostra la zertificazion dla cumpetënzes l savëi fé” spiega l ntendënt ladin Roland Verra.
Tla scoles autes ladines uniral n merdi scumencià l ejam de stat, la matura, cun la prova scrita de talian o tudësch. I candidac possa nstës crì ora danter la doi rujenedes. L segondo di de ejam uniral fat na prova scrita aldò dl urientamënt dla scola: economia aziendela y rujeneda fulestiera tl ITC a Urtijëi, dësseni tla Scola d’Ert Cademia y economia aziendela tl ITC de La Ila. La terza prova scrita vën nce tla scoles autes ladines metudes adum dala cumiscion y reverda la rujeneda che ne ie nia unida crissa ora l prim di. Tla cuarta prova scrita muessa i candidac mustré su si savëi tl’autra materies fé culegamënc aldò de na prova interdisziplinera metuda adum dala cumiscion. I ejams a usc scumencerà aldò dla cumedures dl scrit.
as
