Atualità
Materiai sun la lijëndes ladines tla scoles ladines
USP – La tradizion culturela dla lijëndes ladines dëssa giapé na majera lerch tl nseniamënt te scola. Cun materiai didatics nueves dai ora dala Ntendënza Ladina y dala Lia Culturela Fanes iel per l ann de scola nuef a desposizion na vela de materiai per mparé a cunëscer miec la lijëndes dl Rëni de Fanes.
Tl mpëni per la revalutazion dl avëi culturel plu antich dla lijëndes ladines iel unì dat ora la publicazion de materiai per la scoles dal titul „Fanes – Lijënda y poem“. L vën prejentà l poem dla Lijënda dl Rëni de Fanes te trëi verscions: tl test uriginel ladin, tla traduzion taliana y sëuraprò, per avëi n cunfront cun la cuntia, la verscion ladina tla traduzion de anda Elsa Runggaldier. Leprò iel nce na ntroduzion generela che prejënta l poem nstës. La publicazion ie unida data ora dala Ntendënza ladina n culaburazion cun la Lia Culturela Fanes. L layout ie unì fat da Silke Grossrubascher.
Pensan al nseniamënt dl ladin y dla mujiga iel unì tëut su l poem musical de 34 pec cun mujighes urigineles de Susy Rottonara. Cësta registrazion audio ie stata mesun realisé cun l cuntribut dl Istitut Pedagogich Ladin. L Poem musical – Fanes fova nce unì tëut su y mustrà dala RAI Ladina. Chësta registrazion elabureda cun test ladin y sottituli taliani y tudësc, ie unida data ora te forma de DVD dala Lia Culturala Fanes.
Per l nseniamënt te scola y nce per nteressei iel nsci da garat l cudejel stampà y n DVD che ie da giapé tla sënta dla Ntendënza ladina a Bulsan.
Ntan l ann 2009 fovel pra l Lech de Sompunt a La Ila unì prejentà na reprejëntazion dl poem „Fanes“ de Roland Verra cun mujighes de Susy Rottonara. Chësc poem purtova dant te forma artistica la pertes plu mpurtantes dla lijënda dl Rëni de Fanes te na lingia de poejies de carater epich y cun na mujiga de carater antich che dassova respiedlé la vedla tradizion orala dla cunties di Ladins da plu da giut.
as
