Atualità
Ladins prutagonisc' de na nueva rë de cuntac danter mendranzes
USP - L festival dla mendranzes de Aosta ie finà via n sëira (3 setëmber) cun na detlarazion de ulëi curé na rë de sinergies, cuntac y culaburazion danter la mendranzes. Deberieda cun la mendranzes aostanes, bretones y catalanes à l assessëur Florian Mussner sustenì chësta lianza reprejentan i ladins dla Dolomites.
Pra l „Festival des peuples minoritares“ a Aosta iel unì rujenà dla situazion da ncuei y dl daunì tl’Europa. Mpede se de ju cun chël che ie stat dëssen se cunzentré sun l daunì. Nsci la posizion unitera dl assessëur culturel aostan Laurent Viérin cun l assessëur Florian Mussner, l presidënt dl zënter dla mendranzes etniches CIEMEM dla Catalogna Aureli Argemi y l vizepresidënt dl “Quimper Comunità” dla Bretagna Pierre Le Berre. „La mendranzes muessa se posizioné tl’Europa ajache l’Europa ie nosc daunì“ à dit l assessëur ladin tl forum dl Festival. Danter aostans, bretons, catalans y ladins iel nce la minonga unitera de sustenì la pluriculturalità zënza pierder dal’autra pert la identità dla mendranzes de rujeneda. „L Europa à tan de mendranzes che deguna grupa ne fej plu maiuranza. L daunì ie la mendranzes. Śën iel nosc duvier de curé y sensibilisé per nosta cultures y rujenedes, ma for tla toleranza y tl respet“ nsci la detlarazion de Florian Mussner.
„La mendranzes sëuraviv sce les vën curedes tla vita moderna y no sce la richëza culturela vën metuda te n museum“ à detlarà l assessëur Laurent Viérin, ideatëur dl Festival. Cun la segonda edizion de chësta ancunteda y cunfront danter i populi de mendranza an ulù jì inant tla creazion de na rë de cuntac y culaburazion danter mendranzes dl’Europa. „L ie debujën de duc acioche la mendranzes ebe n daunì y ne vede nia sot tla globalisazion“ à dit l assessëur aostan.
I reprejentanc aministratives dla cater mendranzes à dat pro na detlarazion de culaburazion per ressolver problems che śera l se slargë ora dla mendranzes etniches. L documënt sorissea danterauter che la defrënzes de rujeneda y cultura ie na richëza che muessa unì cureda per duvier di stati. I obietives dla cumuniteies che à fat pea l festival cumporta de se mpenië a na culaburazion stënta, che dura. Na nota particulera ti le unì dat ala scola che à na funzion primara per se slargë ora dla rujeneda y per n’educazion de toleranza che tën cont dla defrënzes.
L’esperienza dl festival à nce dat cunvinzions. „La istruzion sarà la seva dla pesc tl’Europa, perchël saral debujen de jì inant dajan ai jëuni la majera pusciblteies pedagogiches y finanzieres. Me cun l’istruzion puderà la generazions dl daunì se defënder y viver la rujeneda y cultura ladina“ à dit Florian Mussner.
as
Galaria dales fotografies
foto USP/ Deorsola.
Ladins prutagonisc' de na nueva na rë de cuntac danter mendranzes
Mussner: detlarazion dl Festival dla mendranzes a Aosta
- Scarica il file audio 2378 kb
