Scora / Cultura | 04.09.2010 | 09:17

Festival dla mendranzes: la ulentà de mantenì fej la defrënzia

USP - L segondo di dl festival dla mendranzes a Aosta à dat ucajion a paredlé la situazion scolastica danter la Catalogna, Bretagna, Aosta y la Ladinia. L scola ie una dla seves plu mpurtantes per mantenì la mendranzes etniches: ulache l sustëni publich ie dëibl, se à la cumenanza dat da fé.

Do l segondo forum a Aosta iel unì a lum la cumplessità dla defrënta situazions scolastiches. N à udù che la ulentà y la cunvinzion dla populazion à purtà a soluzions che d'autra mendranzes pudëssa nia se n maginé. Per l ntendënt Roland Verra, che à tenì n referat sun la scola paritetica ladina à chësta ancunteda purtà un pensier sterch: „Duta la mendranzes muessa lauré cun cunvinzion. Cun ulentà y mpëni possen arjonjer vares inant, me l sistem istituzionel y la lege ne basta nia".
 
Ta scoles dla region Aosta vëniel nsenià per franzëus y talian a na maniera balanzeda ora. La scoles ie autonomes de nesnië nce l Patuà che ne ie nia materia de ublianza. La rujeneda ie plutosc dëibla perchël vëniel dat gran mpurtanza ala cultura.
 
Di 4,5 milion de zitadins dla Bretagna iel feter 5% che se sënt pert dla mendranza celtica. L stat dla Franzia ti dà puech recunescimënt, nsci ie la scola stizeda defin sun basa ulentera. I privac a tan na gran cunvinzion che i à metù su na si scola ulache l vën nsenià mez per breton y mez per franzëus.
 
L popul plu sterch che à fat pea l festival a Aosta ie i Catalans cun na populazion de 8 milion de persones. Si rujeneda vën te scola nsenieda ala pèr cun l spanuel, i sculeies à n bon livel te tramedoi rujenedes. Davia che i à na gran autonomia, ai nce na bona furmazion universitera di nsenianc.

as

Galaria dales fotografies

L ntendënt Roland Verra à pra l festival dla mendranzes a Aosta purtà dant la problematiches dla scola ladina;