Atualità
Cunsulta Culturela Ladina azetea 27 dumandes
USP - La Cunsulta Culturela Ladina dla Provinzia de Bulsan à chisc dis dat pro l sustëni finanziel per 27 dumandes che reverda ativiteies, nvestimënc y artisc’. Chisc cuntribuc finanziei à l fin de sustenì ulenteres che se dedicheda a fé viver la Cultura Ladina. “Tres la Cunsulta iel per l ann 2010 iel bele unì destinà 576.803 euro per la Cultura Ladina” spiega l assessëur Florian Mussner.
Argumënt prinzipel dl’ultima senteda dla Cunsulta Ladina, ie ai 14 de utober stat la valutazion de dumandes per cuntribuc. La Cunsulta à dat si bënsté a feter 30 dumandes per na soma de ndut 93.700 euro. L proscimo var sarà l decret dl assessëur ladin Florian Mussner y la comunicazion ala lies. Pernan che la lies à pona mandà ite la documentazion puderà unì paià ora i cuntribuc provinziei.
L majer capitul tratà ntan l’ultima senteda reverda i nvestimënc, ulache l ie unì destinà 52.200 euro a 19 proiec. Dla dumandes per l’atività culturela iel unì valutà ciunes che giapa bele cuntribuc dala Region y nsci iel unì dat pro na soma de 25.500 euro per sies dumandes. Per doi artisc’ iel unì azetà n cuntribut de 16.000 euro.
Per l ann 2010 à la Cunsulta Culturela Ladina nchinamò azetà cuntribuc per na soma de 576.803 euro. De dezëmber iel udù dant de traté mo l’ultima dumandes de sustëni provinziel per la Cultura Ladina.
as
