Atualità
Assessëur Mussner anconta i diretëures dla scoles ladines
USP – La reforma dla scola auta unirà tla proscima enes data pro dala Jonta provinziela. Partizions nueves y reorganisazion per la scola ladina se stiza sun cunsultazions che ie unides fates danora. La senteda de (inier) ai 16 de nuvëmber ie stata esprescion de dialogh danter l assessëur provinziel Florian Mussner y i diretëures dl mond dla scola ladina.
La prima delibra mpurtanta che la Jonta provinziela messerà fé n cont dla reforma dla scola auta reverda l plan teritoriel. L assessëur Mussner à tla senteda a Urtijëi fat l pont dla situazion spiegan che te chisc tëmps ne iel nia puscibl azeté duta la prupostes che ie unides purtedes dant da nsenianc y direzions. Argumënt zentrel ie l urganich fërm, che per rejons de stabilità finanziera ne possa nia unì ngrandì, ma che ne vën dal’autra pert nianca smëndrì.
La cumpëides y spartizion dl’ëures de nseniamënt sarà plu inant argumënt de n’autra majera delibra dla Jonta provinziela per mëter n droa la reforma dla scola auta uluda da Roma. L’ispetëura Rosmarie Crazzolara à coordinà i lëures per anjenië la prupostes dla tabeles oraries per la scoles ladines. Nce chëstes ie unides tratedes tl’ancunteda de n merdi.
I cuntenuc de scola cun l sistem paritetich y la rujenedes ne dëssa nia unì tuchei dala reforma dla scola auta. La mudazions cuncretes tla valedes ladines reverda dantaprima la pert aministrativa. “La scola prufesciunela per l artejanat artistich a Urtijëi unirà metuda adum cun l’autra scoles autes ladines che feje bele pert dla Ntendënza” à spiegà Florian Mussner. La reforma porta per chësta scola na mudazion a livel de aministrazion ma nce de gestion di cuntenuc. “Sce la scoles autes tla valedes possa unì gestides deberieda pona ie chësc dessegur n var inant” à dit l ntendënt Roland Verra.
La senteda di diretëures a Urtijëi ie nce stata ucajion per rujené de bujëns y scumenciadives dl nseniamënt. I diretëures dla scoles y dla scolines à dantaprima purtà dant cuestions strutureles sciche per ejëmpl l bujën de ngrandì la scola mesana de Urtijëi.
as
