Atualità
Sotscrì la candidatura per la capitela europea dla cultura
USP – “Fajon pea chësc proiet de candidatura ajache son dla cunvinzion che la defrënzes a n valor y ajache l ie debujën de fé promozion dla particulariteies de nosc raions te n tëmp che l vën rujenà scialdi de globalisazion”. Cun chësc pensier à l presidënt dla provinzia Luis Durnwalder ncuei (prim dezëmber) sotscrì a Unieja l documënt per ufizialisé la candidatura dl Nordest dla Talia per la Capitela europea dla cultura 2019.
L’acurdanza ie unida sotscrita dai respunsabli politics dla regions Veneto y Friuli Venezia Giulia, la Provinzies autonomes de Bulsan y Trënt deberieda cun la provinzia de Verona y l chemun de Unieja. Tl Museo Correr, sun plaza San Marco, l presidënt Durnwalder y l presidënt dl Veneto Luca Zaia, deberieda cun i assessëures ala cultura Franco Panizza (Trentin) y Elio De Anna (Friuli Venezia Giulia) à giapà l bënunì dal ambolt de Unieja Giorgio Orsoni y dal presidënt dla provinzia de Unieja Francesca Zaccariotto. I aministradëures dla sies istituzions à sotscrì l documënt per mëter su n cumité de fundazion che dëssa curé la gestion dla candidatura a Capitela Europea dla Cultura 2019.
La Capitela Europea dla Cultura, ududa dant dala Comunità Europea à la mira de valorisé l avëi, la defrënzes y la carateristiches dla cultures europees. N uel tres chësta recunescënza judé a miuré l azetanza danter i zitadins. Aldò dla rotazion da ann a ann, ti spieta chësta recunescënza tl ann 2019 ala Talia. La candidatura dl Nordest reprejentea na populazion de 7 milion, cun Unieja sciche zënter culturel y n raion cun de plu grupes de rujeneda sciche la provinzia de Bulsan.
“Per nëus, sciche raion de sëida, ie chësta candidatura de mpurtanza ajache la tol ite truepa defrënzes de raion, mostra su particulariteies cun danora la cunvivënza dla trëi grupes de rujeneda” à dit l presidënt Durnwalder. Ël à te si rujeneda sorissà che nëus duc dasson avëi pue’ de stolz de nosc raion, de nosta rujenedes, de nosta tradizions. Unieja ie bele capitela culturela, ma nscila pudons prejenté n mosaich de identità y realtà culturela che ie la richëza de chësta tiera.
La candidatura vëija dant na culaburazion de duta la istituzions ma n cajo nce na porta davierta per autra unions privates y publiches. La recunescënza a Capitela culturela cumporta l mëter a jì ntan dut l ann manifestazions cultureles per fé promozion dl avëi y sustenì culaburazions cultureles. Per nosc raion reverda chësc la cultura tudëscia, taliana y ladina. La vijion dla Comunità europea reverda nce na valorisazion dl raion per fé unì adalerch nvestimënc, scumenciadives cumerzieles y dé pëis a ativiteies inuvatives. Fazion à na tel recunescënza nce tl ciamp turistich, tenian cont che la capiteles cultureles di ani passei à abù 12% de plu jënt pra si manifestazions.
L proscimo majer var dla candidatura sarà de merz cun la senteda dl cumité scientifich, che unirà numinà deberieda cun l cumité de gestion. Nchin dl 2012 muessel unì purtà dant n proiet de rë de raion. Tl ann 2013 saral l Cunsëi Europeich a crì ora la capitela taliana. I autri candidac ie Torino cun provinzia, L’Aquila, Siena, Matera y Palermo. Danter ponc de forza dl Nordest dla Talia ie la truepa scumenciadives cultureles che vën bele pitedes y l suzes dl recunescimënt dla Dolomites da pert dl Unesco.
as
