Atualità

Scora / Cultura | 10.12.2010 | 21:31

Cianties d’Avënt ladines fej ancunté la grupes de rujeneda

USP – L cunzert d’Avënt ciantà y sunà da ladins tl Dom de Bulsan, à nsnuet (10 dezëmber) pità mumënc alternatives al gran busiamënt cumerziel dla zità. L publich che à respundù te na gran cumpëida al nvit dl Assessorat provinziel ladin à ancuntà i ladins mparan a cunëscer si cultura musichela de viver l avënt.

Danter ciantarins y sunadëures, à 84 ladins purtà dant n cunzet d’avënt de marueia. Mo mei ne se ova cores y grupes ladines prejentà deberieda te n cunzert a Bulsan. “L bel cianté y suné che vën curà dassënn te nosc luesc ie na richëza dla cultura ladina che on nsnuet abù ucajion de prejenté al’autra grupes de rujeneda tlo a Bulsan” nsci l assessëur Florian Mussner che à abù la scumenciadiva de chësc cunzert.

L pensier che l Ufize provinziel per la Cultura ladina ova metù dant per chësta sëira ie unì respetà de plën: “L’Avënt dëssa vester n tëmp de reflescion, de meditazion y de pesc”. La paroles danora dl digan Bernhard Holzer à tucà chësc pensier zentrel judan a viver mumënc soc de preparazion al Nadel tl cheder dla mujiga ladina.

De ndut iel sta sies grupes che à sunà y ciantà pec d’Avënt. Otto Delago à prejentà la grupes y à purtà dant vel pensier de reflescion. Melodies d’Avënt à sunà l Brass Quintett de Urtijëi y l’Urchestra Val Badia. Pec a plu ujes ie unic ciantei dal Cor di ëi Saslonch de S.Cristina, l cor dl’ëiles Kérygma da Badia y i doi cuartec, la mutans “De Cater” da Bula y l Cuartet de ëi Göma dla Val Badia.
Duc i pec, ciantei per ladin, tudësch y latin, ie pec de avënt, cris ora per sorissé mumënc de reflescion dan Nadel.