Atualità
Reforma dla scola auta ladina
USP – La reforma dla scola auta per la trëi grupes de rujeneda ie (ncuei) ai 13 de dezëmber stat l argumënt zentrel dla senteda dla Jonta provinziela. Tla cunferënza stampa à l presidënt dla Jonta provinziela nce nunzià vel mudazions n cont dl plann de spartizion y la ndicazions provinzieles ie nce unides tratedes spezificamënter per la scoles autes ladines. Cun l ann de scola nuef uniral te duta la scoles autes ladines tenì doi ëura de Ladin.
Tla Val Badia dëssel unì mantenì doi scoles autes. L Istitut tecnich economich a La Ila ie unì dat pro dala Jonta provinziela. “Danter l gymnasium de scienzes sozieles y de rujenedes dëssa i Ladins nstësc crì ora” à detlarà l presidënt Luis Durnwalder tla cunferënza stampa riesc do la senteda dla Jonta. I assessëures ne azeta à aldò dl presidënt, nia doi gymnasiums a La Lia.
Per Urtijëi iel unì dat pro de mantenì la scoles autes che giapa na numinazion nueva: Istitut Tecnich Economich (aministrazion, finanzes, marketing) y l Liezeo d’Ert cun i ponc zentrei sun ert figurativa, grafica y design. La dumanda do na sezion dl sport a Urtijëi ne ie nia unida azeteda, ma per chësc program puderan jì inant cun l 20% dl’ëures tl cheder dl’autonomia scolastica.
N cont dla ndicazions provinzieles à l presidënt Durnwalder nunzià te cunferënza stampa la segonda ëura de ladin. Chësc uel di che te duta la scoles autes ladines uniral dal proscimo ann de scola tenì na segonda ëura de Ladin de ublianza.
N cont dla direzions dla scoles autes tla valedes ladines à l presidënt dla Provinzia sorissà che les possa me unì mantenides sce tla prima tlas iel almanco 15 sculeies.
as
