Atualità
Urientamënc per la scola auta
USP – La Jonta provinziela à dat pro i urientamënc spezifics per la scoles autes. La dezijion di assessëures provinziei reverda la spartizion dla scoles spezifiches per sport, mujiga y alimentazion. Chisc urientamënc spezifics reverda dantaprima la scoles de rujeneda tudëscia tla ziteies y ne toca nia la scoles autes ladines.
“Danora iel da tenì cont che uni direzion de scola à n’autonomia de aumenté y smendrì l’ëures de nseniamënt nchin a 20%” à dit l presidënt Durnwalder tla cunferënza stampa do la senteda dla Jonta. Chësta autonomia de uni scola posse ruvé nchin a na mudazion de 50% dla singula materia.
La Jonta provinziela à (ncuei) ai 07 de fauré dant pro la luegia y la cumpëida de tlasses lascedes pro per i urientamënc spezifics. Sport uniral pità a Mals y Sterzing ulache l possa unì pità al plu doi prima tlasses. L urientamënt spezifich de mujiga unirà pità te cater scoles autes: a Maran, Bulsan, Persenon y Burnech. Te uni una de chësta scoles possel me unì pità na sëula prima tlas de mujiga. Na furmazion spezifica per l’alimentazion unirà piteda a Maran ulache l puderà unì fat doi prima tlasses. “Cun chësta limitazion de tlasses saral debujën de n ejam de amiscion” à dit Durnwalder.
as
