Atualità
Jonta: cuncors de ideies per l relief de Mussolini a Bulsan
USP – Ala descuscion sce tò demez l relief de Mussolini sun l palaz dla finanzes a Bulsan o no, respuend la Jonta provinziela cun n cuncors de ideies. Te si senteda dl 07 de fauré (ncuei) iel unì dat pro de abiné adum prupostes che ne desdruj nia l relief, ma che l ne sibe nia plu da udëi ala lergia y che l ne sibe nia plu na pruvocazion per la cunvivënza dla grupes de rujeneda.
La pruvocazion che la reprejentazion de Mussolini cumporta per i zitadins dl Südtirol muessa unì tëuta demez. Nsci ne dëssa l relief nia plu vester da udëi ala lergia, ma cun na bona idea artistica dëssel unì abinà na soluzion, per l mustré su sciche te n museum. Tenian cont de chësta posizion ie i assessëures provinziei stai a una scrì ora n cuncors per abiné adum ideies.
Te tëmp de n mëns, nchin ai 7 de merz 2011, possa artisć, architec, storics o chichemei mandé ite prupostes de soluzion (E-Mail: praesidium@provinz.bz.it). L vën damandà de no desdrù l relief, che l ne sibe nia da udëi ala lergia y che l ne cuporte nia plu provcoazion.
La 5 miëura ideies valutedes da na cumiscion unirà prejentedes ala Jonta provinziela per tò na dezijion. Uni un de chisc prim cinch giaperà n pest de 4.000 euro. La cumiscion dëssa unì metuda sun cun cinch cumëmbri, che reprejentea la Provinzia y l Chemun de Bulsan. L dëssa vester doi de rujeneda taliana, doi de rujeneda tudëscia y un n ladin. L reprejentant ladin unì numinà sun pruposta dl assessëur provinziel ala cultura ladina Florian Mussner.
as
