Atualità

Scora / Cultura | 09.02.2011 | 15:30

Prejentà la fiera Futurum 2011 dedicheda ala reforma dla scola auta

USP – La fiera Futurum ne unirà chëst ann nia dedicheda a duta la furmazion dala scolina nchin al’università, ma defin ala reforma dla scola auta. Chësc ie dantaldut de utl per la families de sculeies che muessa nchin ala fin de merz avëi cris ora na scola auta. La terza edizion dla fiera Futurum sarà da udëi dai 17 nchin ai 20 de fauré a Bulsan.

La gran mpurtanza dla fiera à pra la prejentazion (ncuei) ai 09 de fauré sorissà cater assessëures provinziei per la furmazion: Florian Mussner, Sabina Kasslatter Mur, Hans Berger y Christian Tommasini che à prejentà l cunzet dla fiera, metan a cuer la mpurtanza de na bona nfurmazion che ie la basa per crì ora la scola auta adateda. “La cunsulënza per mestier y cariera ie bele ududa dant tla diretives europees de Lissabon, acioche l’Europa possa deventé n raion economich basà su sun l savëi, plu dimanich” à sorissà l’assessëura Kasslatter Mur.

Te tëmps ulache l mestier ideal ne ie nia cis da abiné danter la pusciblteies dates dal marcià de lëur, ne vala nia zënza na decision fata a puntin sun scola y mestier. De chësc viers à i assessëures provinziei fat n apel ala families de no crì ora la streda de furmazion ala lesiera, ma rujenan truep cun i jëuni y sun la basa de na bona nfurmazion.

N servisc de nfurmazion ie nce la fiera dla furmazion, che ie chëst iede dedicheda defin ala scoles autes tl Südtirol. I jëuni possa tla fiera se fé n cheder drët tler dla vela de furmazion che vën piteda per pudëi crì ora plu saurì la scola auta. Davia che de setëmber jirà n drova la reforma dla scola auta, iel debujën de stlarì la cundizions nueves a sculeies che fina la scola mesana y a chëi dla prima tlasses dla scoles autes, tlasses che ne jirà nia plu inant. Futurum pieta la miëur puscibltà de rujené de persona cun esperc y nscì giapé respostes de prima man sun duta la cuestions nia tleres.

L cunzet dla fiera ie fat sun sun la trëi seves nueves dla scoles autes, i lizeums, i istituc y la scoles prufesciuneles. Da pert dl Ufize provinziel per la furmazion uniral pità na udleda generela sun la scoles da crì ora. I nsenianc dla singula scoles prejenterà ulà che vën pità la furmazions, i ciamps de cumpetënza dla scoles cun si ponc zentrei y la furmazion di mestieres. La fiera Futurum puderà unì vijiteda da juebia ai 17 nchin dumënia ai 20 de fauré, uni di dala 9 danmesdì nchin la 6 da sëira tla fiera de Bulsan. Cun chisc orars ne an nia me pensà ala tlasses, ma nce ai genitores.

La fiera vën a se l dé tres la culaburazion de duta la istituzions de furmazion. L assessëur ladin Florian Mussner à metù a cuer che chësc ie n signal tler che la vela de furmazion tl Südtirol ie dut una, che ne fina nia a S. Laurënz o a Puntives. Per Mussner ie propi la rë danter scoles y grupes de rujeneda una dla majera forzes dla reforma dla scola auta.

Per nuzé sinergies y per sparanië custimënt, vëniel chëst ann, deberieda cun la Futurum nce metù a jì i campionac provinziei di mestieres. Tlo saral 170 lerneri y fanc de 19 mestieres che se musererà danter ëi. I urganisadëures dla Lia provinziela per l artejanat LVH/APA se aspieta 5000 sculeies che vën a cialé pro. Per l prim iede ne saral no me artejans jëuni che fej l campionat, ma nce i jëuni dla gastronomia, hoteleria y lëur da paur. I campionac ne vën nia me metui a jì per prejenté de prima persona i mestieres ai vijitadëures dla fiera, ma i vel nce sciche cualificazion ai campionac dl mond di mestieres, che sarà pona de utober a London.