Atualità
De plu dumandes de sustëni per l’atività culturela ladina
USP – Lies che fej atività tl ciamp dla cultura ladina à chëst ann dat ju de plu dumandes per n cuntribut provinziel. Nchin ala fin de jené à l Ufize per la Cultura Ladina giapà 83 dumandes de sustëni al’atività dla lies. Permez ala mesaria di ultimi ani ie la cumpëida auzeda de 20%. L aumënt dla dumandes desmostra che tla valedes ladines iel ti ultimi ani for de plu lies che fej atività culturela.
La 83 dumandes per n cuntribut provinziel reverda ativiteies ordinaries y nce proiec straurdineres tl ciamp dla cultura ladina che la lies se à tëut dant per chëst ann. Danter l 2004 y l 2010 ie la cumpëida de dumandes per ativiteies aumenteda man man, arjunjan na mesaria de 69 dumandes al ann. La cumpëida de dumandes dates ju per l 2011 ie de 20% majera permez a chësta mesaria di ultimi set ani. “Dala dumandes mandedes ite ons pudù udëi che ti ultimi ani iel ruvedes leprò lies nueves che fej atività culturela ladina y avenimënc culturei. Chësc ie n sëni tler per na cultura drët viva ti luesc ladins, n’atività che vën fata dala populazion y sustenida dala Provinzia de Bulsan” spiega l assessëur Florian Mussner.
Dala dumandes mandedes ite iel nce da udëi ora la tendënza che la lies ladines se stënta de plu cun finanziamënc privac y sponsores. La situazion economica atuela porta nce manco mesuns ala man publica y perchël muessa nce la Provinzia ciafië cun mëndri capituli. “L’atività dla lies cultureles ie de gran valor per la cumenanza ladina, perchël ons tla spartizion di cuntribuc bele l ann passà scurtà vel capitul spustan la prioriteies sun l’atività dl ulentariat” dij l assessëur provinziel ladin. Da pert dla repartizion per la Cultura Ladina uelen mantenì l prinzip de na spartizion a na gran cumpëida de ativiteies. “L sustëni finanziel per l’atività culturela ne dëssa nia me judé majeri proiec, ma propi nce la pitla ativiteies dla pitla lies ulache la populazion se da cà cun gran idealism” spiega Alexander Prinoth, diretëur de repartizion.
L Ufize per la cultura ladina à nce chëst ann mandà si culaburadëures diretamënter ti luesc ladins per pité l servisc de nfurmazion y pië do de prima man la dumandes de sustëni. Chësc servisc ie unì nuzà drët truep a Al Plan de Mareo ulache l ie unì dat ju plu dumandes permez a l’udienza tenida a Badia. Te Gherdëina, alincontra, ie la cumpëida de dumandes stata drët valiva danter i trëi luesc. “Dantaldut ai respunsabli nueves dla lies on pudù spieghé de prima persona l sistem de fé dumanda y cie documënc che l va debujën per giapé n sustëni finanziel dala Provinzia” nsci l’esperienza de Barbara Perathoner y Alex Piccolruaz dl Ufize per la Cultura Ladina.
as
