Atualità
L cumité de candidatura per la capitela culturela 2019 unirà metù su a Bulsan
USP – Tl 2019 ulëssa la Provinzia de Bulsan deventé l zënter dl nteres culturel de Europa. Deberieda cun i raions dl Nordest dla Talia se anjinien ala candidatura per deventé capitela europea dla cultura 2019. N juebia ai 24 de fauré uniral a Bulsan sotscrì la fundazion dl cumité de candidatura cun vel nota ladina.
La zeremonia per mëter su ufizialmënter l cumité unirà ai 24 de fauré tenida tl Museion a Bulsan cun la prejënza de autoriteies politiches y dl ciamp culturel. Che la provinzies de Bulsan, Trënt y Unieja ie a una cun la regions de Veneto, Friuli Venezia Giulia oven bele ufizialisà de dezëmber cun n’acurdanza a Unieja. Te chësc proiet vëijen na bona ucajion de culaburazion tl ciamp culturel per dut l Nordest dla Talia, ma nce per abiné sinergies che juda a se miuré a livel nternaziunel. Per la Provinzia de Bulsan iel na bona ucajion per mustré su la particulariteies dla trëi grupes de rujeneda y la maniera de cunvivënza. La grupa de rujeneda ladina giaterà te chësta ucajion si lerch.
Aldò dla rotazion danter i paejes dl’Europa ie l ann 2019 udù dant per n raion dla Talia. L Nordest ie un di candidac.
La fundazion dl cumité de candidatura ie prugrameda per n juebia ai 24 de fauré, dala 11.00 danmesdì tl Museion, streda Dante 6 a Bulsan. L sotscrizion unirà fata dal vizepresidënt dla provinzia Christian Tommasini deberieda cun i reprejentanc de Unieja, la provinzies y regions che fej pea la candidatura. Danter la persunaliteies nviedes iel nce l musizist jazz de Maran Franco D’Andrea, l scultëur de Sëlva Aaron Demetz y l campion olimpich de marcia Alex Schwarzer. Reinhold Messner y Matteo Thun sarà da udëi tres n culegamënt video.
as
