Atualità
L’assessur Mussner sön le "Dé internazional dl lingaz dla uma"
USP - Le lingaz dla uma é n valur che ne dess nia ma gnì sotrissé en ocajiun dl dé internazional che le recorda. Na pert de ci ch’i sun é lié al sonn y significat de chësc prüm lingaz ch’i un aldì da pici insö, che à formè nosc pinsier y dè parores a nüsc sentimënc”, scrî l’assessur Florian Mussner en ocajiun dl dé internazional dl lingaz dla uma ai 21 de forà.
Inće n pice lingaz à n gran valur, aladô dl assessur ladin, che arata che al ne pois nia gnì sostituì da val’ da d’ater. Vigni ater lingaz che vëgn imparè laprò à n valur y nes dëida da se daurì ales atres porsones y cultures y rové inant cun competënzes laprò. Sciöche ladins ùnse la capacité de imparè laprò deplü d’atri lingac, a chi ch’i dun inće valur, mo da ćiasa sunse te chël che é por nos le pröm. Les families cun deplü lingac dess inće restè plurilinguales zënza che un n lingaz ne dominëies sön l’ater. Ales families di migranć podunse inće ti aconsidé da mantignì so lingaz de proveniënza. “Vigni pröm lingaz nes dà la poscibilité de se sintì da ćiasa y de restè lià ala cultura y tradiziun familiara”, scrî inant l’assessur ala scora y cultura ladina.
N momënt important por dè espresciun de nosta cosciënza, de nosc lingaz y de nosta identité ladina sarà le censimënt de otober de en chësc ann, che ti darà a düć i ladins y residënć te nostes valades y ai ladins y ales ladines cun sües families che vir defora da nostes valades da renforzè le plü pice grup linguistich. “Al é porchël n fin ch’i sun bugn de aumentè o almanco mantignì bun la perzentuala de dan da 10 agn por podëi dè inant les poscibilitês de svilup, de laûr tl setur publich y de finanziamënć a bëgn de nosta jënt ladina y de süa cultura”, stlüj jö l’assessur Mussner so comunicat.
SAN
