Atualità
Jonta n cont de calënder, festa y sport tla scoles
USP – I calëndri de scola dëssa, da scola a scola, deventé plu valives. N vënderdi ai 18 de merz, l di do la festa naziunela ne dëssel nia unì juntà mo n di de feries y l program per l sport te scola ie stai argumënc tla senteda dla Jonta provinziela (ncuei) ai 21 de fauré.
Danter l prim de setëmber y l 30 de juni muessa uni scola prugramé si 210 dis de nseniamënt. Vel scola vën me tenida danmesdì, d’autres fej tan de ëures via per l’ena a na maniera da nia messei giaurì la sada. La gran defrënza di calëndri danter una scola y l’autra cumporta dificulteies de urganisazion sciche per ejëmpli cun l trasport de sculeies. I assessëures provinziei ie stai a una che n dëssa abiné plu cundizions valives sciche per ejëmpl n cont de orars y dis liedesc. L presidënt à cunedì te cunferënza stampa che ntan la proscima enes uniral rujenà cun i respunsabli de scola per valivé i calëndri y per na miëur coordinazion.
L vënderdi riesc do la festa naziunela per l unità dla Talia (17 de merz) dëssa l nseniamënt de scola inò jì inant ne fajan nia n puent de feries. La Jonta provinziela à tëut chësta dezijion per l 18 de merz, tenian cont che truepa scoles lëura nce de sada.
Per i programs de sport te scola iel unì dat pro n finanziamënt de 340.000 euro. Chisc scioldi vën dantaprima adurvei dala ntendënzes dla trëi grupes de rujeneda per mëter a jì i campionac de feter 20 disciplines sportives a livel de raion y de provinzia, ma nce per fé pert la fineles naziuneles. De ndut iel uni ann danter 16.000 y 18.000 sculeies che fej pea chësta garejedes.
as
