Atualità
La scolines ladines cuer la dumanda dla families
USP – La scolines ladines à per l proscimo ann de scola pudù azeté feter duta la dumandes da pert dla families. Tla 17 scolines dla Val Badia y de Gherdëina uniral d’autonn tëut su 743 mutans y mutons.
Cun 743 sculeies resta d’autonn la cumpëida tla scolines ladines feter unfat sciche chëst ann, permez ala iscrizions de merz dal ann passa nen iel un de plu. Tl ann de scola 2011-12 saral tla scolines ladines 15 mutans y mutons de plu permez ala mesaria di ultimi cin ani.
I cunsëies de 15 scolines sun 17 à pudù seguré la lerch per l proscimo ann de scola a duta la families che à damandà. Me a Urtijëi y a S. Lenert iel mo sculeies che aspieta sun na lerch. 12 mëndri che aspieta sun na lerch ie me 1,6% de 743 sculeies. “Mpede mandé i pitli tla scolina ujina uel vel families plu gën aspité sun la lista de spitanza” spiega l’ispetëura Edith Ploner. Nce sce la cumpëides ne ie da ann a ann nia unfat ti singuli luesc iel tres urganisazion interna dla grupes y dl personal stat mesun dé na resposta positiva a feter duta la families dla valedes ladines. La majera mudazion de cumpëida saral de setëmber tla scolina de La Val ulache cun 48 mutans y muntons nen saral 11 de plu permez a chëst ann.
La tendënza de mandé i mëndri bele cun doi ani y mez y trëi ani ala scolina se à pra la iscrizions dantaldut mustrà te Gherdëina. “Te de majeri luesc abiteia la families plu daujin ala scolines y damanda nsci na lerch nce per i plu pitli. Autramënter iela ulache la families vif ora di zëntri, iló se i tën la families plu gën a cësa nchin do i tëi ani” dij l ispetëura ala scolines ladines. I scric ite nchin trëi ani de età fej ora feter l 30% di sculeies per l proscimo ann de scola. Tla scolina de Sëlva iel 36% di mëndri cun doi y trëi ani, tla trëi scolines danter Urtijëi y Sureghes iel 28%. “Tò su mutans y mutons mo tan pitli uel nce di n majer mpëni per la scolina, ajache i adrova d’autri materiai de juech y n raport plu strënt cun l’educadëssa sciche persona de referimënt” dij Ploner. La mutans y i mutons sot a trëi ani ie mo te n’autra fasa de svilup, te scolina mperi plan plan a sté tla grupa y a jughé tla grupa.
La families ulache tramedoi genitores muessa lauré se à nce damandà l orar de scolina slungià. Chësc reverda per l proscimo ann de scola me i luesc de Gherdëina. Te Sëlva, y Urtijëi puderà 39 mutans y mutons se nuzé dl servisc dla scolina nce do la trëi domesdì.
Danter la 743 mutans y i mutons che puderà de setëmber jì ala scolina iel de ndut 38 imigrei. 14 de chisc mëndri jirà tla scolina Salieta a Urtijëi , 9 a Al Plan.
as
