Atualità
Autoriteies uel svilupé inant la repartizion universitera ladina
USP – Co che dëssa unì furmei i nsenianc ladins vëniel ncuei (6 auril) tratà te n cungres a Persenon. Cun chësc cunvëni vëniel festejà i 10 ani dla Repartizion ladina d’Università y i respunsabli plu auc dl’università cun l assessëur provinziel ladin à te chësta ucajion mpermetù sustëni per svilupé mo inant la repartizion ladina. Ntan l di vëniel paredlà reformes dl sistem furmatif ti raions de mendranza ujins y dat lerch à prupostes nueves che dëssa mustré su la streda dla repartizion ladina per l daunì.
Bele la rujenedes de giaurida dl cungres “Le ladin tl sistem furmatif” à dat da ntënder che i tëmps ie madures per giaurì stredes nueves tl ciamp dla furmazion universitera di ladins. La mira dl cungres ie de tlupé adum prupostes per adaté la furmazion di nsenianc dla scoles ladines ai bujëns da ncuei y dl daunì. Dal’autra pert iel nce unì sorissà l valor dl lëur scientifich de chësta repartizion universitera che à mo n gran potenzial per cuntribuì al’identità ladina y ala posizion tl cuntest plurilinguistich dl’Univesità de Bulsan.
Da pert dla Jonta provinziela à l assessëur ladin sciazà dassënn l lëur che ie unì fat dal 1988 nchin ncuei n cont de furmazion y atività scientifica. Zënter dla furmazion tla valedes ladines ie l plurilinguism. “Nce tl daunì messons dé inant la legrëza y la cunvinzion per chësta pitla rujeneda, che ie me pitla per la cumpëida de persones, ma rica per se nstëssa” à dit Florian Mussner. Ti cialan ala streda dl daunì à l assessëur provinziel nvià a priejé la particulariteies dla cultura ladina ne schivan nia fadies. Da si pert, à Mussner segurà mpëni per l finanziamënt da pert de Provinzia y Region.
Tl’Università de Bulsan iel 1800 studënc che vën da 61 nazions. Danter chisc iel chëst ann nce 66 studënc ladins. L presidënt dl’università Konrad Bergmeister à sorissà che dlongia na bona furmazion di nsenianc dëssel nce unì svilupà inant la pert scientifica per arjonjer na miëur’ fazion sozio-culturela. L presidënt à nvià à dé plu pëis a cie che cunlieia ajache la va de crië relazions cun l’autra grupes de rujeneda per na miëura posizion di ladins.
Mpulsc sciche chël de giaurì la repartizion ladina nce a d’autra grupes prufesciuneles ie unides dala reprejentanta ladina tl cunsëi de università Manuela Nocker. L retëur Walter Lorenz à danterauter rujenà de slargë ora la prejënza ladina nce tla sëntes universiteres a Bulsan y Burnech. La posizion y la funzion dla realtà ladina n relazion ai gran fredesc tudësc y taliani ie stat l pensier dl digan de facultà Franz Comploi.
La situazion atuela y la pruspetives per l daunì dl sistem furmatif dla Provinzia de Bulsan à prejentà l ntendënt Roland Verra. Per giapé na vijion plu lergia iel nce unì prejentà la situazion dla scoles y scolines n referimënt ala reformes che ie unides fates ti Grijons, tl Friul, te Fascia y te Fedom.
Mirella Florian, sëurastanta dla scola fasciana, à rujenà dl ladin curicolar y dl ladin veicolar. Sun la situazion atuela y pruspetives dl sistem friulan à rujenà Federico Vicario, prufessëur dl’Università de Udin. Sun la pruspetives ti Grijons do che l ie unì purtà l Rumanc Grijun tla scoles à rujenà Rico Cathomas, prufessëur dl’Università de St. Gallen y gran espert de didatica ntegreda.
La segonda pert dl cunvëni (ncuei domesdì) ie dedicheda al repartizion ladina dl’università. Si cuordinadëur Theodor Rifesser rujenerà dl svilup storich, cunzec y materiai didatics n relazion a pruspetives per l daunì. Sun l’atività scientifica y didatica cun si cunseguënzes sun l raion rujenerà l prufessëur de ladinistica Paul Videsott. De lëur scientifich che ie bele unì fat rujenerà la prufessëura dl’Università de Dispruch Heidi Siller-Runggaldier prejentan l segondo liber sun la gramatica paredleda dedicà ai determinanc y pronoms.
Mpusc mo plu cuncrec per la repartizion ladina dl’università de Bulsan se aspieten tla descuscion che stluj ju l cunvëni. Respunsabli dla scola y furmazion ladina traterà de cie che la scolina, la scola y la cultura ladina se aspieta dala furmazion di nsenianc ladins.
as
