Atualità
Hannelore Insam à venciù l cuncors da diretëura dla scolines ladines
USP - Dan doi ani fovel unì spartì la ncëria da ispetëura y diretëura dla scolines ladines tres la lege provinziela nueva sun ala formazion. Chisc dis à Hannelore Insam venciù cun gran merit l cuncors per sëurandé da nuef la ncëria da diretëura. Chësta stiera cumporta la urganisazion y l svilup urganisatif per 743 sculeies cun 104 culaburadëures tla 17 scolines dla valedes ladines.
Tl ejam scrit y a usc à Hannelore Insam desmustrà si cunescënzes n cont de urientamënt pedagogich, urdinamënt giuridich-aministratif, dl seguré la cualità dl servisc y dla lege sun la furmazion. La comisciun cun l'ispetëura per la scolines talianes Renza Celli, la diretëura dla scolines de Neumarkt Beatrix Aigner y l diretëur de repartizion Alexander Prinoth à valutà la cunescënzes de Hannelore Insam cun la miëura notes. "Hannelore Insam à bele ti ultimi ani da vizediretëura y śën da diretëura nciarieda mustrà cumpetënza tla funzion da manajè na gran direziun despartida sun doi valedes, gran mpëni y pruspetività" sorissea l'ispetëura ala scolines ladines Edith Ploner.
La giuria à dassënn laudà la bona preparazion de Insam y si cualiteies persuneles per la ncëria da diretëura dla scolines. Ufizialmënter sëurantulerala chësta ncëria cun l proscimo ann de scola canche la se trata de mëter a jì 104 nseniantes y culaburadësses pedagogiches plu 37 che ne lëura per l mumënt nia per maternità o autra rejons. Cun 743 sculeies à la direzion dla scolines la majera cumpëida de sculeies y de scolines permez al'autra direziuns ladines. La ncëria se damanda cunescënzes tl urdenamënt giuridich, tla pedagogia dla prima nfanzia, nseniamënt adatà de plu rujenedes, cunescënzes tla psicologia de svilup, te mudazions inovatives, tla evaluazion, te argumënc de privacy y tl udenamënt dl personal.
"La particularità dla 17 scolines ladines ie che la situazions n'é nia dlonch unfat, per la diretëura se tratela de garantì chësta defrënzes y tl medemo mumënt de mantenì na vijion unitaria mantenian i medemi prinzips" spiega l'ispetëura.
Hannelore Insam possa se stizé sun 33 ani de esperienza te scolina. Ot ani iela stata dirijënta dla scolina Salieta a Urtijëi, ulache la à nce mustrà n gran mpëni canche l fova unì frabica da nuef. Do vester stata vizediretëura dla scolines ladines ie Insam i ultimi doi ani stata diretëura nciarieda. Per vëncer l cuncors metù a jì dal Ufize provinziel de urganisazion se à ëila nce juà de si furmazion speziela da dirijënta de scolina y de na furmazion per cumpanië praticantes.
as
