Atualità
Mussner sön le dé mondial dla varieté culturala por le dialogh y le svilup
USP - En ocajiun dl dé mondial dla varieté cultura por le dialogh y le svilup, ai 21 de mà, ti recorda l’assessur ladin Florian Mussner ai Ladins de ciarè dles tradiziuns, dles usanzes y dl lingaz y de i dè inant, mo ince de ne se stlü nia a ci che é nü.
Avisa por na mendranza sciöche i Ladins él de gran importanza da mantignì la cultura cun sües tradiziuns y usanzes, y da ti les dè inant ales generaziuns che vëgn dô, sotrissëia l’assessur Mussner. Le sostëgn finanziar de ativitês y proieć culturai dassù é massa püch, ara va debojëgn dl impëgn de düć, insciö Mussner. „Ma sce düć se dà da fà por la cultura y le lingaz ladin, poi gnì mantignis y ai ne va nia sot tla globalisaziun che crësc“, sotrissëia Mussner. Te chësta ocajiun rengraziëia l’assessur ladin dantadöt les families y i colaboradus y les colaboradësses dles strotöres de formaziun y culturales, sciöche inće i volontars y les volontares dles lies culturales. „Ëi dà le contribut plü important por mantignì la cultura di Ladins“, sotrissëia Mussner.
Mo al ne n’é nia ma important da mantignì la cultura, mo bëgn inće le svilup, alza fora Mussner. „An mëss inće ester daverć por le nü y sostignì le svilup dla cultura tl spirit europeich“, dij l’assessur ladin.
USP
