Atualità
Mussner: "L fina n bon ann per la Scola ladina"
USP – La scola fina. Per velch scumëncia la feries, per d’autri i ejams y pona n capitul nuef tla vita. Nce per la Scola ladina se stluj n capitul. Dantaldut per la scola auta che ie unida refurmeda scumencerà de setëmber n capitul nuef. L assessëur ladin Mussner y l ntendënt Verra sorissea che la mudazions, i miuramënc y la reorganisazion ie states mesun tres la culaburazion y la bona ulentà de duc chëi che lëura per la istruzion de nosc sculeies.
Per la Scola ladina se stluj n ann cun de plu dezijion mpurtantes per la scola auta. La reforma à purtà denuminazions nueves, n azënt plu sterch sun na furmazion de basa y la puscibltà de baraté plu saurì scola do la segonda tlas de scola autra. Tl proscimo ann de scola uniral te duta la scoles autes tenì doi ëura de ladin. L ie stat n ann de gran muvimënt dantaldut a Urtijëi cun la direzions dla Scola d’ert che se cruzierà nce dla scola prufesciunela che deventerà paritetica. “Per diretëures y nsenianc ne ie chësta mudazions nia states saurì. Mpurtant iel che tl zënter dla furmazion sibe l sculé o la sculea ntëss” dij l assessëur Florian Mussner.
Studi y evaluazions à mustrà su resultac positives per la scola ladina tl ciamp dla rujenedes. “I resultac prejentei da permò sun la cumpetënza dla trëi rujenedes mostra che son sun la drëta streda y nce ciuna che ie la direzion da jì inant” nsci l assessëur provinziel per la scola ladina. Propi al daunì ie dedicheda la inuvazion tl ciamp didatich cun l’alfabetisazion cun de plu rujenedes y la didatica linguistica ntegreda. “Ti cialan al daunì saral nce debujën de abiné na soluzion per l recunescimënt dl diplom de maduranza paritetica per l trilinguism” dij l ntendënt Roland Verra. La reforma dla scola auta ie fata, l ie śën mo da stlù ju l prozes de reforma de duta la furmazion dala scolina nchin ala scola auta, tenian conta nce dla regulamentazion nueva per la furmazion di nsenianc.
L scumëncia na paussa meriteda per duc canc, per chëi che lëura tl’aministrazion, chi che nsënia y sambën per i sculeies y si families. L assessëur y l ntendënt ala scola ladina mbincia a duc n bel instà y na bona preparazion a chëi che fajerà i ejams.
as
