Atualità
Le liber sön la storia di ladins vëgn presentè tles singoles valades ladines
USP – Le gran liber sön la storia di Ladins dles Dolomites dè fora dal Istitut Ladin vëgn presentè ciamò trëia iadi d’agost. Ai 5 d’agost a Col de Santa Lizia, ai 11 d’agost a Urtijëi y ai 19 a Corvara.
Te 760 plates – arichides cun 400 fotografies, passa 30 chertes storiches, documënć, grafics, caricatöres y indesc di argomënć – cunta l’autur dl liber „Storia dei ladini delle Dolomiti“, Werner Pescosa, la storia di ladins ti jon do ai avenimënć plü importanć; al spliga l’identité dla mendranza y baia dla vita d’al dedaincö tles valades dolomitiches. Tröpa importanza ti dàl inće al svilup dl lingaz, l’elemënt plü important por chël che i ladins sënt al dedaincö de ester n grup etnich y linguistich por so cunt.Le liber pîta – da dì en cört – na panoramica a 360° dla storia di ladins, presentan n’analisa valgamia sota di svilups tl raiun dolomitich, dala preistoria ćina al dedaincö, y ti ćiaran plü avisa a chi avenimënć politics, soziai, culturai y economics che à caraterisé y influenzé fora por i secui le lingaz, la cultura y l’identité dla comunité ladina.
Do le suzès dles presentaziuns dl liber tignides chëst’aisciöda a San Linert, a Cortina d’Ampëz y a Vich te Fascia, vëgn le liber śëgn inće presentè te de plü ocajiuns, nia ma resservades a chi dl post, mo inće ai tröc ghesć y foresć che vëgn da foradecà a passè sües vacanzes tles Dolomites. Insciö ti vëgnel pité a düć l’ocajiun de conësce le liber, mo inće de imparè val’ de plü sura la storia di ladins.
Ai 5 d’agost gnarà le liber presentè dales 20.30 tla ex scora elementara a Col de Santa Lizia y ai 11 d’agost dales 21.00 tla sënta dla „Lia mostra d’ert“ a Urtijëi.
Por stlü jö chësc „tour“ gnarà la storia di ladins presentada te n contest valgamia particolar, chël de „Un libro, un rifugio – Incontri con l’autore nel cuore delle Dolomiti“ metü a jì dal’Assoziaziun Turistica dl’Alta Badia, olach’an ti à conzedü n post d’onur. Chilò gnarà le liber presentè dal autur Werner Pescosta, adöm cun le presidënt dla Maratona dles Dolomites Michil Costa y le diretur dl Istitut Ladin Leander Moroder, ai 19 d’agost dales 18.00 tl salf dles manifestaziuns a Corvara.
usp
