Atualità
Finanziamënt per la cultura ladina: mudazions tres l pruporz
USP - La Provinzia de Bulsan sustën la cura y l mantenimënt dla cultura judan dantaprima tl finanziamënt. I scioldi a desposizion vën spartì su aldò dl pruporz danter la grupes de rujeneda. La reduzions de bilanz te chisc tëmps toca nce la mëndra grupa de rujeneda: “La spartizion di finanziamënc puderà unì mudeda dai resultac dla cumpededa dla jënt che ie l pruporz nuef per i proscimi 10 ani” sorissea l assessëur provinziel ladin.
L ann passà ova la Provinzia de Bulsan messù smëndrì 6,8% di finanziamënc culturei. Chëst ann iel mo n iede 6% de manco a desposizion y per l proscimo ann iel inò da se aspité na reduzion. Te chisc tëmps de crises economiches, à nce l aministrazions publiches manco scioldi a desposizion. “La populazion ladina à de utober, tres la cumpededa dla jënt, la puscibltà de tenì adum y purvé a miuré la relazion de cumpëida permez al’autra grupes de rujeneda. De cunseguënza unissa nce mudeda la spartizion di finanziamënc per la cultura” dij Florian Mussner.
Per l ann 2011 à la Provinzia de Bulsan metù a desposizion 55,7 milion de euro per sustenì l’ativiteies cultureles. Aldò dl pruporz iel sautà ora 1.735.898 euro per la grupa de rujeneda ladina. Tlo muessen nce to n cunsciderazion che vel servijes a bën dla populazion ladina, vën finanziei tres l’assessorat tudësch (per ejëmpl la biblioteches, la furmazion permanënta, la RAS o fundazions). L Assessorat provinziel ladin spartësc i scioldi per la cultura te cin capituli. L ann passà ie la majera pert (589.894 euro) unida spartida su danter 166 lies, artisć y istituzions che ova fat dumanda tres la Cunsulta culturela ladina. Na gran pert di scioldi per la cultura ladina ie nce unic adurvei per judé a finanzië l Isitut Ladin Micurà de Rü che ova giapà passa 400.000 euro. Na mëndra pert di finanziamënc per la cultura ladina (feter 152.000 euro) ie l’ann passà unic adurvei per opres artistiches, films y libri. 47.320 euro ie unic dai ala zaita La Usc di Ladins y 45.500 euro ie unic adurvei per proiec de educazion.
L lëur per y cun la junëza ladina vën chëst ann sustenì cun 544.976 euro.
Ativiteies de educazion permanënta per la populazion ladina vën sëuraprò mo finanziedes tres l ufize provinziel furmazion permanënta. Tres chësta zentrela vëniel nce finanzià l’ativiteies di cunsëies de furmazion.
Cultura tudëscia* | 40.853.350 euro (73,36%) |
Cultura taliana | 13.100.707 euro (23,52%) |
Cultura y jëuni ladins | 1.735.898 euro (3,12%) |
DE NDUT | 55.689.955 euro (100,00%) |
as
